Աշոտ Գրիգորյանը կոչ է անում արտերկրի հայության օգնությունը, օլիգարխներից հավաքված միջոցներն ու պարգևավճարները բաժանել ամենաանապահով ընտանիքներին

ԵՀՄՖ նախագահ դոկտոր Աշոտ Գրիգորյանի պահանջում է Հարյուրավոր միլիոն դոլլարի հասնող գումարները՝ արտերկրի հայության օգնությունը, օլիգարխներից հավաքված միջոցները և անօրինական վճարված ինքնապարգևավճարները բաժանել Հայաստանի ամենաանապահով ընտանիքներին։

Նա այդ մասին հայտարարություն է տարածել, որում մասնավորապես նշված է․

«Երկրի տնտեսական վիճակը դառնում է բացառիկ ճգնաժամային, և շաբաթներ անց ՀՀ բնակչության 30 տոկոսը զրկվելու է օրապահիկից։ Վարչապետ Փաշինյանն արդեն զլանում է նույնիսկ օգնության խոստումներ տալ, և մտածում է միայն հավաքված հարյուրավոր միլիոնները գրպանելու մասին։

Ներկա իշխանությունների կողմից հայ օլիգարխներից և մեծահարուստներից հավաքված գումարները, «ըստ օդում կախված լուրերի» անցնում է մի քանի հարյուր միլիոնի սահմանը, իսկ եվրոպահայերի ու ամերիկահայերի միլիոնավոր դոլլարների ու եվրոների հասնող օգնությունները՝ «ամբարված» վարչապետի տիկին Աննա Հակոբյանի ֆոնդի հաշվեհամարներին՝ այդպես էլ մնացին անթափանց։ Կան կասկածներ, որ Աննա Հակոբյանը իր հսկայական ճանապարհորդական ծախսերը (թանկարժեք հյուրանոցներ, մասնավոր ինքնաթիռներով թռիչքներ, սեփական շքախումբը, ներառյալ` վարսահարդարին հետը «քարշ տալը») վճարում է ամբողջովին ֆոնդերի և/կամ բյուջեի հաշվին։

Ժողովրդի համար այս չափազանց կարևոր գումարների անպատասխանատու և անբարո ծախսը մնում է տիկին Աննայի և վարչապետ Նիկոլի պատասխանատվության վրա, որի շուրջ մենք սպասում ենք բացատրությունների։

Ըստ հաշվարկների՝ այդ ֆոնդերի վրա հավաքված գումարները և, «ըստ օդում կախված լուրերի»՝ ավելի քանի 70 մլն․ դոլլարի հասնող պարգևավճարները բավարար են, որպեսզի կորոնավիրուսի ճգնաժամային այս ժամանակահատվածում ամեն կարիքավոր պետությունից ստանա ամսական 200 դոլլար գումարի օգնություն։ Այո՛, նախարարների և չաշխատած ԱԺ պատգամավորների պարգևավճարները բավարար են, որպեսզի իր վաղվա օրը չապահոված ՀՀ քաղաքացին ստանա ամսական 200 դոլար հավելավճար, որը, մեր կարծիքով՝ փրկության միակ ելքն է ստեղծված այս իրավիճակում։

Ահա սրան է նվիրված ԵՀՄՖ նախագահ դոկտոր Աշոտ Գրիգորյանի կոչ-նամակը՝ ուղղված վարչապետ Փաշինյանին, որը ներկայացնում ենք ստորև․

***

ՀՀ վարչապետ
Պրն․ Նիկոլ Փաշինյանին

Հարգելի պրն․ Փաշինյան,

Ձեզ ուղղված մեր նախորդ՝ ս/թ մարտի 23-ի և 26-ի նամակներում նշված օգնության մեր առաջարկները մնացին անպատասխան։ Պատճառը մեզ համար այսօր արդեն հայտնի է․ Դուք չունեք այն օգնության կարիքը, որը պետք է տրամադրվեր երկրին ու ազգաբնակչությանը մեր հսկողության ներքո։

Այս եզրակացությանը կարելի է գալ՝ պարզապես վերլուծելով երկրի ներսում մեծահարուստներից ու օլիգարխներից բռնագանձված գումարների անթափանցիկ հավաքագրման, ինչպես նաև արտերկրի հայության կողմից Հայաստանին ուղղված օգնությունների անհայտ ճակատագրի հանգամանքը։ Ե՛վ Միացյալ Նահանգների, և՛ Եվրոպայի մեր հայրենակիցները պահանջում են հստակ հրապարակել այդ գումարները տրամադրած անձանց անունները, ինչպես նաև այդ գումարների ծախսման հաշվետվությունը։

Հաշվի առնելով կորոնավիրուսի հետևանքով ստեղծված պայմաններում բնակչության վրա առաջացած սոցիալական լրացուցիչ ծանր բեռը, երբ օրհասական այս պահին օրավարձով աշխատողները զրկված են իրենց օրվա հացի փողից, ավելի քան կես միլիոն վարկառուներն արդեն ունեն մեծ խնդիրներ վարկի թե՛ ամսավճարները, թե՛ սոցիալական կոմունալ ծախսերը կատարելու հարցում՝ պահանջում ենք այդ հավաքված բոլոր գումարները ներկայացնել հանձնաժողովին, որը մենք պատրաստ ենք ստեղծել Ձեզ հետ միասին և բաժանել կարիքավորներին՝ մինիմալ ծավալով ամսական 200 դոլլար գումար։ Անկասկած, շատ ավելի էական օգնություն կլինի, եթե այդ գումարներին ավելացնենք նաև այն 70 մլն․ դոլլարը, որը պաշտոնական տվյալներով որպես պարգևավճարներ բաժանվել է ԱԺ-ում և Կառավարությունում (թիվը ճշտման կարիք ունի, այն անկասկած` ավելի մեծ է)։ Արդյունքում՝ հնարավոր կլինի 10-օրյա ժամկետում կազմակերպել ճգնաժամային վիճակից դուրս գալու համար ստեղծված ֆոնդի աշխատանքները և բաշխել գումարները ազգաբնակչությանը։ Ըստ մեր հաշվարկների՝ սա կօգնի կորոնավիրուսի բերած տնտեսական ճգնաժամի հետևանքները եթե ոչ չեզոքացնելուն, ապա կտրուկ մեղմելուն։

Խնդրում ենք հաշվի առնել, որ մեր այս կոչին հետևելու է արտերկրի հայությունը՝ երկիրը հզոր խնդիրներից փրկելու նպատակով։

Հուսամ, որ առավելագույնս եռօրյա ժամկետում Ձեզնից կստանանք տրամաբանված պատասխան համագործակցության լուրջ առաջարկներով։

Սպասում ենք Ձեր արագ արձագանքին։

Հարգանքներով՝

Եվրոպայի հայկական միությունների
ֆորումի նախագահ՝
դոկտոր Աշոտ Գրիգորյան
02․04․2020թ»․