Կճոյանին բերեցին, որ Ալենին մոռանանք

Երեկ Ազգային ժողովի փոխնախագահ Ալեն Սիմոնյանն իր ֆեյսբուքյան էջում որոշեց խոսել մի ողջ ժողովրդի անունից ու գրել, թե ժողովուրդը պահանջում է իր հոգևոր հովվի հեռացումը:

Մի կողմ թողնենք այն, որ Ալեն Սիմոնյանին որևէ մեկը չի լիազորել ժողովրդի անունից նման հայտարարություն անել և նա դա անելու իրավունք չունի, խնդիրն այստեղ առավել խորքային է:

Պարզվում է իշխանության ձեռքը կրակն ընկած այս պաշտոնավորները մոռացել են, որ Սահմանադրությունն իրենց արգելում է խառնվել եկեղեցու գործերին և դա օրենքի պահանջ է:

Բայց խնդիրը պետք է դիտարկել նաև բարոյականության դաշտում ու հասկանալ, արդյոք նորօրյա իշխանավորներն ունե՞ն բարոյական իրավունք եկեղեցուն դեմ դուրս գալու, չնայած, եթե հիշենք թավշյա իշխանափոխությունից հետո եկեղեցու դեմ կազմակերպված հարձակումները, ապա շատ խելք պետք չէ հասկանալու համար, որ մեր իշխանությունը թքած ունի այդ նույն բարոյականության վրա և պատրաստ է իր նպատակների իրականացման համար գործի գցել անգամ ձեռքի տակ եղած ուժային լծակը:

Իշխանությունը որոշեց ցույց տալ իր ուժն այդ կառույցի միջոցով, որը նրան օգնության է հասնում բոլոր նեղն ընկած ժամանակներում:

ԱԱԾ-ն հայտնվում է, երբ բյուջեում փող չկա ու նախկիններին պետք է թափ տալ, ԱԱԾ-ն հայտնվում է, երբ պետք է Ալեն Սիմոնյանին փրկել համազգային քննադատությունից ու հիշեցնում է իր մասին, տարածում պաշտոնական հաղորդագրություն Նավասարդ Կճոյանին առնչվող հայտնի օֆշորի գործի մասին ու ցրում բոլորի ուշադրությունն Ալենի վրայից:

Հերթական անգամ իշխանությանն իր տապալումից գալիս է փրկելու ուժային կառույցը, սակայն սա ժամանակավոր էֆեկտ է ունենալու, որովհետև իշխանության սիրելի ժողովուրդն այդ նույն ԱԱԾ-ի կողմից տարածվող հաղորդագրություններով այլևս չի կերակրվում, որովհետև տեսել է, որ արդեն երկու տարի է որևէ նախկին պաշտոնյայի բանտ նետել այս իշխանությունը չի կարողացել, ինչն անելու համար խելք է պետք, ավաղ....

NewsPress.am