38-ամյա տղամարդը «Կանալում» ընկերոջը դանակահարելու մեջ է մեղադրվում. նա կալանավորվել է

2020թ. ապրիլի 19-ին՝ ժամը 23.40-ին, «Աբովյան ԲԿ» ՓԲԸ-ից հաղորդում է ստացվել այն մասին, որ «որովայնի առաջային պատի կտրած-ծակած վերք» ախտորոշմամբ իրենց մոտ բուժօգնության է դիմել Աբովյան քաղաքի 35-ամյա բնակիչ: Այս մասին տեղեկացնում է ՀՀ քննչական կոմիտեի տեղեկատվության և հասարակայնության հետ կապերի բաժինը։

ՀՀ ՔԿ Կոտայքի մարզային քննչական վարչության Աբովյանի քննչական բաժնում դեպքի առթիվ քննվող քրեական գործով իրականացված քննչական և դատավարական այլ գործողությունների արդյունքում պարզվել է, որ 2020թ. ապրիլի 19-ին՝ ժամը 23.00-ի սահմաններում, Աբովյան քաղաքից դեպի Ջրաբեր տանող ավտոճանապարհի «Կանալ» կոչվող տարածքում, նախկինում միմյանց հետ ունեցած պարտք ու պահանջի հարցը պարզելու շուրջ երկու ընկերների միջև առաջացած վիճաբանության ընթացքում, 38-ամյա տղամարդը իր հետ նախապես վերցրած դանակով մեկ անգամ հարվածել է 35-ամյա ընկերոջ որովայնին՝ վերջինիս առողջությանը պատճառելով ծանր վնաս:

Ձեռք բերված բավարար ապացույցների համակցությամբ` 38-ամյա տղամարդուն մեղադրանք է առաջադրվել՝ ՀՀ քրեական օրենսգրքի 112-րդ հոդվածի (դիտավորությամբ առողջությանը ծանր վնաս պատճառելը) 1-ին մասով նախատեսված արարքն առերևույթ կատարելու համար: Վերջինիս կալանավորվել է:

Նախաքննությունը շարունակվում է: