Արմեն Սարգսյանը հեռավար զրուցել է ՀՀ վաստակավոր արտիստուհի Անահիտ Մխիթարյանի հետ

Հանրապետության նախագահ Արմեն Սարգսյանի նախաձեռնած՝ «Նախագահական համերգաշար»-ի շրջանակում անցյալ տարի նախագահական նստավայրում անցկացվեց հայկական ռոմանսի երեկո: Այդ օրն ունկնդիրը մասնակից դարձավ անմոռանալի մի երեկոյի, որի ինքնատիպ զարդն Ալ․ Սպենդիարյանի անվան օպերայի եւ բալետի ազգային ակադեմիական թատրոնի առաջատար մեներգչուհի, Հայաստանի Հանրապետության վաստակավոր արտիստուհի, միջազգային մրցույթների եռակի ոսկե մեդալակիր եւ երեք «Գրան պրի»-ների դափնեկիր Անահիտ Մխիթարյանի կատարումներն էին: Այս մասին տեղեկանում ենք ՀՀ նախագահի պաշտոնական կայքից։

Կորոնավիրուսի համավարակով պայմանավորված՝ մշակութային կյանքը շատ այլ ոլորտների նման հարկադրված դադարի մեջ է: Սակայն տանը մեկուսացած լինելով հանդերձ՝ արվեստագետը չի կարող փակվել ինքն իր մեջ, առավել եւս՝ չստեղծագործել: Այդ մասին երգչուհին հավաստիացրել է նախագահ Արմեն Սարգսյանի հետ հեռավար զրույցում՝ նշելով, որ որ տանը մնալով էլ շարունակում է երգել: Ճիշտ է, այս դեպքում խոսքը համերգային բեմի կամ բազմահազարանոց դահլիճի մասին չէ, սակայն կյանքը շարունակվում է:

Նախագահ Սարգսյանը հետաքրքրվել է Անահիտ Մխիթարյանի ծրագրերով, որոնք, ինչպես շատ արվեստագետների պարագայում, ժամանակավորապես առկախված են: Նախագահը քաջալերել է երգչուհուն՝ շարունակել ստեղծագործել, նշելով, որ նրա ստեղծագործական գործունեությունը շարունակում է պահանջարկված մնալ արվեստասերների շրջանում, եւ ժամանակավոր դադարը չի նշանակում հանդիսատես-արվեստագետ կապի ընդհատում: Նախագահը եւ երգչուհին խոսել են նաեւ ստեղծված իրավիճակում առցանց «համերգ»-ի հնարավորության մասին:

Ակնկալվում է, որ ապագայում նույնպես «Նախագահական համարգաշար»-ի շրջանակում համագործակցությունը երգչուհու հետ կշարունակվի: