Հրազեններ, նռնակներ, փամփուշտներ. ոստիկանության բաժիններում կամավոր զենքեր են հանձնվել

Ոստիկանության Արմավիրի բաժնի քրեական հետախույզների բացատրական աշխատանքի շնորհիվ ապրիլի 27-ին Արևիկ գյուղի բնակիչ, 61-ամյա մի կին կամավոր հանձնել է թմբուկավոր ատրճանակ, նռնակներ, նռնակի պայթուցիչ և տարբեր տրամաչափի 40-ից ավելի փամփուշտ, որոնք, ըստ նրա՝ պատկանել է հանգուցյալ ամուսնուն։

Դարձյալ ապրիլի 27-ին ոստիկանության Արմավիրի բաժնում տեղեկություններ էին ստացվել, որ մարզի բնակիչներից մեկը չգործող մի շինության մոտ հրազեն է թողել։ Տարածք մեկնած օպերատիվ խումբը հայտնաբերեց օպտիկական սարքավորումով և գործարանային համարով հրազեն։

Արթիկի ոստիկանների բացատրական աշխատանքի շնորհիվ էլ Փոքր Մանթաշ գյուղի բնակիչներից մեկը կամավոր հանձնել է պայթուցիչով «Ֆ-1» տիպի նռնակ ու տարբեր տրամաչափի 130-ից ավելի փամփուշտ՝ հայտնելով, որ հանգուցյալ հորը պատկանած զինամթերքը գտել է խորդանոցը մաքրելիս։

Ոստիկանության Աշտարակի բաժնի քրեական հետախույզների բացատրական աշխատանքի շնորհիվ ապրիլի 28-ին Ուջան գյուղի մի բնակիչ հանձնել է տարբեր տրամաչափի 237 փամփուշտ, «Ջ-1» տեսակի 1 նռնակ՝ առանց պայթուցիչի, նռնակի 6 պայթուցիչ և հակատանկային նռնականետի 1 նռնակ: Նրա հայտնածով՝ դրանք պատկանել են հանգուցյալ եղբորը։

Պայթուցիչներով նռնակներն ու ինքնաձիգի 280-ից ավելի փամփուշտները Քանաքեռ-Զեյթունի քրեական հետախույզների բացատրական աշխատանքի արդյունքում բաժին է հանձնել Երևանի 36-ամյա մի բնակիչ։ Նրա հայտնածով՝ հանգուցյալ պապին պատկանած զինամթերքը գտել է ավտոտնակում։

Նշանակվել են դատաձգաբանական փորձաքննություններ։

Հիշեցնենք, որ ապօրինի պահվող զենք-զինամթերք կամավոր հանձնողներն ազատվում են քրեական պատասխանատվությունից։