Կորոնավիրուսի վարակակիրներից 8-ին միացված է արհեստական շնչառություն, 80-ի վիճակը ծանր է, 30-ինը՝ ծայրահեղ ծանր

Վերջին տվյալներով կորոնավիրուսի վարակակիրներից 8-ին միացված է արհեստական շնչառություն, 80-ի վիճակը ծանր է, 30-ինը՝ ծայրահեղ ծանր: Այս մասին Ազատություն ռադիոկայանի հետ զրույցում ասաց առողջապահության նախարար Արսեն Թորոսյանը:

Նա ասաց, որ ծայրահեղ ծանրների, թոքաբորբ ունեցողների թիվն աճում է և դա բնական է, որովհետև, եթե տոկոսով վերցնենք, բացարձակ թիվն աճում է և հետևաբար այդ տոկոսը դրա մեջ աճում է:

Հարցին՝ մայիսի 14-ին վերջանում է արտակարգ դրությունը, հնարավո՞ր է այն երկարացվի, նա արձագանքեց. «Փաստ չէ, որ վերջանում է. 14-ից մի քանի օր առաջ որոշում կկայացվի երկարացնե՞լ, թե չէ: Նույնիսկ սահմանափակումների ռեժիմը թեթև պահելով՝ հնարավոր է արտակարգ դրության ռեժիմը պահպանվի»:

Հարցին, թե մարդկանց ազատ տեղաշարժի, ինչպես նաև տնտեսության մի շարք ոլորտների նկատմամբ կիրառվող սահմանափակումների վերացումը ի՞նչ հետևանք կարող է ունենալ, Ա. Թորոսյանը պատասխանեց՝ դա հնարավոր է բերի թվերի աճի, բայց հնարավոր չէ մշտապես փակված վիճակում ապրել.

«Մենք պետք է սովորենք ապրել, իսկ այդ սովորելու գործընթացը որքան արագ և անցավ կանցնի, կախված է բոլորիցս։ Քանի որ եթե ցավոտ սովորենք, այսինքն՝ եթե լինեն շատ մահեր, դա դժբախտություն կլինի բոլորիս համար, բայց այլընտրանք չունենք, մենք պետք է սովորենք ապրել նոր կանոններով՝ դիմակ կրել, պահպանել սոցիալական հեռավորությունը, ձեռքերն ախտահանել»։