«Արդյունավետ չեք աշխատել, դրա համար էլ հանել ենք». Փաշինյանը` Ուրիխանյանին

«Քանի որ շատ եք խոսում աշխատատեղերի մասով, խնդրում եմ՝ ասեք, թե ի՞նչն էր խանգարում, որ Տիգրան Ուրիխանյանը շարունակեր օգնել երկրին, կառավարությանը, իշխանությանը: Այդ խնդրի լուծմանը հասնեինք, հետո նոր ինձ հանեիք հիմնադրամից»:

Այսօր ԱԺ-ում հայտարարեց Տիգրան Ուրիխանյանը՝ ցանկանալով վարչապետից իմանալ իր հետ վերջինիս չհամագործակցելու պատճառները:

Պատգամավորն իր խոսքում հայտնեց, որ սկսած 2018 թվականից 9 անգամ աջակցության ձեռք է մեկնել կառավարությանը, վարչապետին, առանձին հանդիպել են, ոտի վրա խոսել են, ԱԺ-ում պաշտոնապես 4-5 անգամ հարցը բարձրացրել է, օրենսդրական նախաձեռնություններ է ներկայացրել: Դրանով փորձել է օգնել բացահայտել Զինծառայողների սոցիալական ապահովության հիմնադրամի հաշվին 87 հացար աշխատողի աշխատավարձերից ամսական 870 մլն դրամ կազմող 1000-ական դրամ վճարների անհետացման պատճառները:

«Ես նստած սպասում եմ ՊՎԾ-ի ստուգումներին, մեր՝ ձեր հետ համատեղ աշխատանքին, բայց ստանում եմ կառավարության 613-Ա որոշումը, որով Տիգրան Ուրիխանյանը հանվում է կառավարության քվոտայով ներկայացված Զինծառայողների սոցիալական ապահովության հիմնադրամի հոգաբարձուների խորհրդի կազմից»,- նկատեց պատգամավորը:

Տիգրան Ուրիխանյանը հայտնեց, որ մոտ 6 ամսվա գումարը չկա:

«Դատախազությունից գրություն ենք ստացել, որ գաղտնի ծախսեր են իրականացվել, վերջապես ձեր օգնականից գրություն ունեմ, որտեղ գրված է, որ 1.9 մլրդ-ի հասնող պարտավորություններ չեն կատարվել: Ցիկլը, աշխատատեղը, այդ ամենը հասկանալի է, բայց փողն ո՞ւր է»,-հարցրեց Տիգրան Ուրիխանյանը:

Նիկոլ Փաշինյանը հարց ուղղեց դահլիճում նստած պաշտպանության նախարարին, թե արդյո՞ք կատարել են պատգամավորին սպառիչ պատասխան տալու իր հանձնարարականը:

Դավիթ Տոնոյանը դրական պատասխան տվեց:

«Բա ինչո՞ւ է այդ դեպքում նորից հարց տալիս պատգամավորը: Գուցե հավաքվենք խոսենք, կամ գուցե քննիչ հանձնաժողով ստեղծենք: Ես բացառում եմ, որ այնտեղ որևէ բան այնպես չե, բայց եթե պարզվի, որ այդպես չէ»,- հայտարարեց Փաշինյանը և շեշտեց, որ Ուրիխանյանը, որպես հոգաբարձուների խորհրդի անդամ պետք է պատմեր դրանց մասին, ոչ թե հարց տար:

Ուրիխանյանը նկատեց, որ իրեն արդեն հանել են աշխատանքից:

«Արդյունավետ չեք աշխատել, դրա համար էլ հանել ենք»,- եզրափակեց Փաշինյանը: