Հեղափոխությունը խժռում է իր կերտած գեներալ-մայորին

Ազգային անվտանգության ծառայության նախկին տնօրեն Արթուր Վանեցյանին Հատուկ քննչական ծառայություն հրավիրելով գործող իշխանությունը հերթական անգամ ցույց տվեց, որ այս երկրում այդ մարմիններում հայտնվում են նրանք, ովքեր իր քիմքին հաճո չեն, ովքեր կարող են ասել այն, ինչի մասին նախընտրում են լռել թավշյա հեղափոխականները:

Ճիշտ են ասում, որ հեղափոխությունը խժռում է իր զավակներին, դա փայլուն ձևով արտահայտվում է թավշյա Հայաստանում, որտեղ օրվա իշխանությունը կերտած ու ժամանակին այդ իշխանության ամենավերին էշելոններում հայտնված մարդիկ այսօր դառնում են հակահեղափոխականներ, հարցաքաննվում, հետո էլ հայտնվում մեկուսարաններում:

Դա իր հիմնավոր պատճառներն ունի, այդպես է, որովհետև ժամանակի ընթացքում կամ մարդիկ հասկանում են, որ սխալ մարդու հետ են քայլել, կամ ավելի պարզ ճշմարտություն է բացահայտվում՝ չկա հեղափոխություն, կա ընդամենը իշխանափոխություն և նորերը իրենց պահում են այնպես, ինչպես նախկիները, հարստանում են այնպես, ինչպես նախկիները, հաղթահարում իրենց աղքատությունը նույն նախկինների պես, կեղծ բարեպաշտներ դառնում՝ դարձյալ նախկինների պես:

Ազգային անվտանգության ծառայության նախկին տնօրեն Արթուր Վանեցյանը, որին իշխանությունն այդես էլ չկարողացավ տեղորոշել՝ նախկին, թե ներկա է նա, հիմա դարձել է այս իշխանության կոկորդին կանգնած մի ոսկոր, որից ամեն գնով պետք է ազատվել ու որքան արագ, այնքան լավ՝ նախ շոուների պակաս հասարակությունը չի ունենա, երկրորդ՝ Նիկոլ Փաշինյանի ճանապարհից կվերացվեն խոչընդոտները, որոնցից են Միքայել Մինասյանն ու Արթուր Վանեցյանը:

Հիմա պարզվում է Վանեցյանի քաղաքական ակտիվությունը խանգարում է իշխանությանը, իսկ եթե հաշվի առնենք, թե ինչ պաշտոն է զբաղեցրել նա, ապա Նիկոլ Փաշինյանին միայն նրա լռությունն է, բայց ինչպես ցույց տվեց ժամանակը Վանեցյանը չլռեց. նա խոսում է հաճախ, փոքր չափաբաժիններով ու հավակնում դառնալ այս իշխանությանը լուրջ ընդդիմադիր ու քաղաքական բևեռ ձևավորող ռեալ ուժ, ուստի ինչ է պետք իշխանությանը, եթե ոչ՝ արագ չեզոքացնել այդ վտանգն ինչն էլ այսօր իրականացվում է, պարզապես մի տարբերությամբ՝ նա փորձում է իր ճանապարհից հանել այն մարդուն, ում կարճ ժամանակ առաջ գեներալ-մայորի կոչում տվեց:

NewsPress.am