Սա մեր և իմ ամենամեծ պարտությունն է հեղափոխությունից հետո. Նիկոլ Փաշինյանի անդրադարձը՝ հայտնի միջադեպին (տեսանյութ)
Արդեն երկու տարի հեղափոխական թիմը շարունակաբար ենթարկվում է բարոյական ու հոգեբանական բռնությունների: Այդ մասին Ազգային ժողովում ասաց վարչապետ Նիկոլ Փաշինյանը:
«Խորհրդարական մեծամասնության կին պատգամավորներին սոցիալական ցանցերում սպառնում են բռնաբարել, նրանց երեխաներին սպառնում են փողոցներում սատկացնել»,- ասաց Փաշինյանը:
Նրա խոսքով՝ այդ ամենն ունի մեկ նպատակ՝ խեղճացնել քաղաքական մեծամասնությանը, քայքայել քաղաքական մեծամասնությանը, քայքայել ժողովրդի և քաղաքական մեծամասնության միջև առկա վստահությունը:
Փաշինյանն անդրադարձավ իր և Մարույքանի միջև երեկ կայացած հանդիպմանն ու նշեց, որ ինքը Մարուքյանին ասել է, որ իրենք ունեն հիմքեր կասկածելու, որ նրանց գործունեությունն այդ ողջ հոգեբանական և բարոյական բռնությունները և, ի վերջո, ֆիզիկական բռնություններ գործարկելու պլանի մի մասն է:
«Ես այսօր դիտելով տեղի ունեցածի տեսագրությունը՝ մի պարզ հարց եմ տալիս՝ միջադեպը, որը դատապարտելի է, տեղի է ունեցել ա՛յ, այնտեղ, ի՞նչ գործ ուներ ելույթ ունեցողն այնտեղ կանգնած: Երբ որ ամբիոնից իջնում էր և մեծ արագությամբ ընթանում էր դեպի Սասուն Միքայելյանը, ինչի՞ համար էր գնում՝ քաղաքական երկխոսություն ծավալելո՞ւ: Կամ որտեղի՞ց վստահությունը, եթե նույնիսկ Սասուն Միքայելյանը տեղից վեր էր կացել, շարժվել էր, որտեղի՞ց վստահությունը, որ նա ուղղակի, վրդովմունքն իր ձևով արտահայտելով՝ դուրս չէր գալու այս դահլիճից: Տեղի ունեցածը, քան սադրանք, քստմնելի սադրանք, ես չեմ կարող անվանել, մանավանդ այդ տեսագրությունը մի քանի անգամ դիտելուց հետո: Ես ուզում եմ ուղիղ ասել՝ ես դատապարտում եմ նաև այն, որ մենք տրվում ենք այդ սադրանքներին: Իմ եղբորը, իմ ընկերոջը ես դատապարտում եմ, որովհետև մենք իրավունք չունենք տրվել սադրանքների»,- ասաց Փաշինյանը:
Մանրամասները՝ տեսանյութում
