Անվտանգ վարակը, անօգուտ դիմակները, շուն-կորոնավիրուսն ու բլեֆը․ մեր անլրջությունը գալիս է ձեր անլրջությունից

Կառավարությունը, կորոնավիրուսի հետ կապված, անընդհատ հասարակությանը լրջանալու կոչեր է անում և հորդորում մատների արանքով չնայել։ Վարչապետ Նիկոլ Փաշինյանն ու Առողջապահության նախարար Արսեն Թորոսյանն էլ պարբերաբար հիշեցնելով, որ չեն ուզում խուճապ ստեղծել, հայտարարում են, թե վիրուսը չի նահանջի մոտավորապես 5 տարի, եթե մարդիկ ավելի լուրջ չվերաբերվեն ու կանխարգելիչ միջոցառումներ չձեռնարկեն․․․

Նրանք անընդհատ կրկնում են, որ վիրուսը բլեֆ չէ, սարքած չէ, ինչպես մտածում են շատերը, այլ ամենաիսկական համաճարակ, որը լուրջ վտանգներ է ներկայացնում․․․

Իհարկե, այս կոչերին ու հայտարարություններին կարելի է սթափ ու լուրջ վերաբերվել, եթե իրենք՝ այդ ուղերձները հասարակությանն ուղարկողները, գիտակցեն ու ի վերջո հասկանան, թե ինչու հասարակությունը իրենց չի հավատում։ Նրանք նախ և առաջ իրենք պետք է իրենց իսկ խոսքերին ամենայն պատասխանատվությամբ ու լրջությամբ վերաբերվեն։

Արսեն Թորոսյանը, ով այսօր հայտարարում է լրջության  մասին ու հիվանդության վտանգավորության աստիճաններն է ներկայացնում, դեռ վերջերս, լրագրողների մտահոգիչ դիտարկմանը, թե աշխարհով մեկ մեծ թափ է առել կորոնավիրուսը, սակայն մենք ընդունում ենք թռիչքներ, այցելուներին չենք թեստավորում ու չնայած աշակերտների համատարած հիվանդություններին ու բացակայություններին, դպրոցները շարունակում են գործել, նեղսրտած պատասխանեց, թե «այդ վիրուսը իրենից ոչ մի լուրջ բան չի ներկայացնում, անվտանգ է դա սեզոնային հիվանդություն է», այսօր արդեն նա ուզում է, որ մարդիկ լուրջ վերաբերվեն իր հայտարությանը, թե վիրուսը կա, վտանգավոր է ու քաղաքական շահեր չի սպասարկում․․․

Երկրի վարչապետն էլ քամահրանքով ու ծիծաղելով ֆեյսբուքյան լայվ էր մտել ու հայտարարում էր, թե «վիրուսն ում շունն է, տե՞նց վիրուսներ են եկել-գնացել․․․», իսկ այսօր այդ մարդը պահանջում է հասարակությունից լրջանալ և մատների արանքով չնայել․․․

Ցավալի է, որ երկրի պետական այրերը, ում ձեռքին է այսօր ողջ իշխանությունն ու մի ամբողջ ժողովրդի ճակատագիր, հանդես են գալիս հայտարարություններով, որոնց պատասխանատվությունը չեն կրում․․․

Օրեր առաջ, այս երկու պաշտոնյաները, մեկը մյուսին կրկնելով, հայտարարեցին, թե բաց տարածքներում դիմակներ կրելը անիմաստ է, որ մաքուր օդն ու արևը ոչնչացնում են այս վիրուսի միկրոբները, իսկ դիմակները նպաստում են վիրուսի արագ տարածմանը, ու բացի այդ, դիմակներն ըստ էության չեն պաշտպանում․․․

Այսօր արդեն նույն խնդրի շուրջ նրանք այլ ձևակերպում ունեն։ Ավելին, իշխանությունը ներկայացնող ու ղեկավարարող այս անձիք պարտադրում են հասարակությանը դիմակ կրել ու տուգանում են, եթե քաղաքացին դիմակ չունի․․․

Չի քննարկվում նաև այն, որ շոգ եղանակին դիմակ կրելն առողջական ավելի լուրջ խնդիրներ կարող է առաջացնել, հատկապես շնչառական խնդիրներ ունեցող քաղաքացիների մոտ․․․ Որքանո՞վ է լուրջ, մաքուր օդում կրել դիմակ ու իբրև թե պաշտպանվել մի անհայտ վիրուսից, որին ժամանակին անվտանգ շուն են անվանել այն պաշտոնյանները, ովքեր այսօր ստիպում են հավատալ, որ ամեն ինչ շատ լուրջ է։

Եթե երկրի ղեկավարների նախնական հայտարարությունները անլուրջ չեն եղել, և նրանք գիտակցել են ինչ են խոսում, ապա ինպե՞ս չմտածել, որ նրանց այսօրվա իրարամերժ հայտարարությունները զուտ քաղաքական շահ է հետապնդում, հատկապես, երբ տնտեսությունը խղճուկ վիճակում է, ու Փաշինյանի խոստումներն էլ չեն իրականցվել։ Սա լուրջ առիթ է անհաջողությունների մեղքը բարդել վիրուսի վրա։

Իսկ եթե այնուամենայնիվ այսօրվա հայտարարություններն են ճիշտ և վարակի հետ կապված ամեն ինչ շատ լուրջ է, ապա  այս դեպքում էլ նշանակում է, որ երկրի ղեկավարն ու մարդկանց առողջության գլխավոր պահապանը առնվազն անգրագետներ ու անպատասխանատու մարդիկ են, որ առանց իրավիճակը ուսումնասիրելու՝ հանդես են եկել նման անլուրջ հայտարարություններով  ու ժամանակին անվտանգության միջոցառումներ չեն ձեռնարկել, թեև կարող էին ամեն ինչ կանխել։ 

Իսկ այսօր արդեն ունենք արձանագրված ծանր ու միջին ծանրության դեպքեր և մահեր․․․․ դա հենց ղեկավարների անլրջության ու ամեն ինչին մատների արանքով նայելու արդյունքն է․․․

Փաշինյանն ու Թորոսյանը հասարակությունից պահանջում են մի բան, որն իրենք չունեն՝ պատասխանատվություն, լրջություն։ Բայց եթե յուրաքանչյուր քաղաքացի ինքն է իր անպատասխանատու քայլերից անմիջական տուժողը, ու իր պատասխանատվության կրողը, ապա երկրի ղեկավարի դեպքում, տուժում է ամբողջ պետությունը՝  իր քաղաքացիներով ու տնտեսությամբ․․․

Սա չգիտակցել, նշանակում է՝ տեղում չլինել․․․

Այնպես որ, երբ երկրի ղեկն իրենց ձեռքը վերցրածները պահանջում են հասարակությունից լուրջ վերաբերվել իրենց հայտարարություններին ու վարակը բլեֆ չանվանել, ապա նախ պետք է մտածեն, թե ո՞վ է մեղավոր, որ հասարակությունը քամահրանքով ու անլուրջ է վերաբերվում իշխանության հայտարարություններին ու  կոչերին, որոնք իրարամերժ ու փոփոխական են։

Ընդ որում, սրանք այն դեպքերն են, երբ բացահայտ ճշմարտություններ են և չեն կարող կախված լինել իրավիճակից՝ վիրուսը կամ լինում է վտանգավոր, կամ չի լինում, դիմակը կամ լինում է օգտակար, կամ չի լինում․․․․

Մի խոսքով, ինչպես դասականը կասեր՝ մեր անլրջությունը գալիս է ձեր անլրջությունից․․․

Արմինե Մկրտումյան