Դիմակ չկրելու համար պատգամավորին դահլիճից դուրս հրավիրելու իմ որոշումը կարող են բողոքարկել ՍԴ-ում, որ կազմով էլ այն գործելիս լինի․ Միրզոյան (տեսանյութ)

Ազգային Ժողովի նախագահ Արարատ Միրզոյանն իր ելույթի ժամանակ ողջունեց «Լուսավոր Հայաստան» խմբակցության պատգամավորներին՝ ԱԺ վերադառնալու համար։

«Առավոտից շտապեցինք քննարկել օրակարգի հարցերը և մոռացանք ողջունել մեր գործընկերների վերադարձը խորհրդարան։ Ուզում եմ ողջունել «Լուսավոր Հայաստանի» որոշումը՝ վերադառնալ և մասնակցել նիստերին»,- ասաց ԱԺ նախագահը։

Նա նշեց, որ մամուլից էլ տեղեկացել է, որ իր գործընկերները խորհրդարան կվերադառնան այն դեպքում, երբ կհնչի տեղի ունեցածի դատապարտում և կլինի քաղաքական գնահատական: Այժմ, տեսնելով նրանց նիստերի դահլիճում, Արարատ Միրզոյանը նկատեց, որ կարող է ենթադրել, որ այդ գնահատականը հնչել է և բավարարել է «Լուսավոր Հայաստանին»:

«Այո, տեղի ունեցածը դատապարտվել է, դատապարտվել է վարչապետի կողմից, ֆրակցիայի բազմաթից գործընկերների կողմից»,- ասաց նա:

Անդրադառնալով Էդմոն Մարուքյանի այն պնդմանը, որ ԱԺ նախագահն իրավունք չունի դիմակ չկրելու համար պատգամավորին նախազգուշացում հայտարարել կամ դուրս հրավիրել նիստերի դահլիճից՝ Միրզոյանն նկատեց, որ համավարակի պայմաններում յուրաքանչյուրը կարող է լինել վարակի կրող և ինքն էլ չիմանա այդ մասին։

«Առանց իմանալու կարող է գա առանց դիմակի և չգիտակցելով, վարակի մյուս պատգամավորերին, սա կնշանակի խոչընդոտել ԱԺ-ի բնականոն աշխատանքները և ԱԺ նիստի բնականոն ընթացքը, իսկ նիստի բնականոն աշխատանքը խոչընդոտելու համար ԱԺ կանոնակարգ սահմանադրական օրենքը ԱԺ նիստը նախագահողին ընձեռում է մի շարք հնարավորություններ, այդ թվում՝ նախազգուշացումը, խոսափողից զրկելը, մեկ օրով դահլիճ թույլ չտալը, 7 օրով և այլն»,- ասաց Միրզոյանը՝ հավելելով, որ եթե ինչ-որ մեկը դրա հետ համաձայն չէ, ապա իր այդ որոշում բողոքարկել՝ ընդհուպ Սահմանադրական դատարանում, որ կազմով էլ որ այն գործելիս լինի։