Իմ տղայի գործը բացահայտելը Փաշինյանի վարչապետ դառնալուց հետո առաջին խոստումն էր․ անհայտ կորած տղայի մայրը Փաշինյանին հիշեցնում է խոստման մասին

2011 թվականի ճիշտ այս օրը՝ հունիսի 2-ին, Սյունիքի մարզի Կապան համայնքի 30-ամյա բնակիչ Արա Խաչատրյանին ընկերները սեփական տնից հանեցին և նա այլևս չվերադարձավ։

Արդեն 9 տարի է անցել, իսկ նրա մայրը՝ Էմմա Հարությունյանը շարունակում է ծեծել պաշտոնյաների դռներն ու արդարություն պահանջել՝ խնդրելով գտնել իր որդուն ու մնացել է  անպատասխան։ Իսկ ավելի կոնկրետ՝ պատկան մարմինները նրան պատասխանում են, թե առևանգում տեղի չի ունեցել, և տղան համարվում է պարզապես անհայտ կորած․․․ Մինչդեռ Էմմա Հարությունյանը վստահ է՝ գործը պարզապես կոծկում են։ Հարազատները նկատում են, որ իրավապահներին հայտնի են դեպքի մանրամասները և գիտեն, թե ովքեր են եղել Արայի «անհետացման» մեղավորները, սակայն մատը-մատին չեն տալիս գործը բացահայտելու համար։ 

NEWSPRESS.am-ի հետ զրույցում էլ որդու հետ կապված միջադեպի պատճառով անորոշության մեջ հայտնված մայրը նույնիսկ անուններ է տալիս․ «Իմ որդին անհայտ չի կորել, նրան առևանգել են ամենամոտ ընկերները՝ Գարիկ Գրիգորյանը, Արսեն Մկրտչյանը, Վիկտոր Հայրապետյանը և Արտավազդ Հարությունյանը»,- ասում է կինն ու նշում, որ իր որդին չափված-ձևած տղա է եղել, որևէ խնդիր չի ունեցել:

Մեզ հետ զրույցում տղայի մասին դրական խոսեցին նաև նրան ճանաչողները։ Վերջիններս նկատում են, որ Արա Խաչատրյանի առևանգման մասին լսել են, սակայն ոչ մի բացասական վարքագիծ չեն նկատել Արայի կողմից․ նա խաղամոլ չէր և վատ համբավ էլ չի ունեցել։

Մեզ հասած տեղեկություններով, Արային տնից հանած ընկերներից մի քանիսը երկրում չեն, իսկ մյուսներին չեն հարցաքննում, համենայդեպս դեռևս ոչ ոք պատասխանատվության չի ենթարկվել։

Մայրը՝ տիկին Էմման, տարբեր ատյաններ նամակներ է ուղարկել և ստացել միևնույն բովանդակությամբ պատասխաններ. «գործը ընթացքի մեջ է»: Նա անգամ դիմել է ՀՔԱ միջազգային կառույցին, որտեղից նրան իր նամակն ուղարկելուց 4 տարի անց պատասխանել են, թե գործով Հայաստանում զբաղվում են պատկան մարմինները:

Էմմա Հարությունյանը տղային հայտնաբերելու և մեղավորներին պատժելու համար տարբեր ատյանների է դիմել և նախկին իշխանության ժամանակ, և գործող․․․

NEWSPRESS.am—ը գրել էր, որ Էմմա Հարությունյանը գործող վարչապետ Նիկոլ Փաշինյանին դիմել է դեռևս նրա պատգամավոր ժամանակ, սակայն վերջինս միայն խոստում էր տվել, որ գործով կզբաղվի՝ միայն այդքանը։ Իսկ հետո, երբ արդեն նա վարչապետ էր և մայիսի 11-ին ամբոխի միջով շարժվում էր դեպի կառավարության շենք՝ իր անդրանիկ նիստին մասնակցելու, նրան առաջինը իր խնդրով մոտեցավ Էմմա Հարությունյանը։

Փաշինյանը հիշեց տիկին Էմմային, և այս անգամ արդեն որպես երկրի ղեկավար, խոստացավ անպայման զբաղվել խնդրով և հարցին լուծում տալ։ Փաշինյանը զանգահարեց արագ արձագանքման օպերատիվ խմբին, տվեց կնոջ անունը, հանձնարարեց զբաղվել խնդրով և մտավ կառավարության շենք:

Սա Նիկոլ Փաշինյանի առաջին խոստումն էր, որը նա տվեց արդեն որպես վարչապետ, սակայն որն այդպես էլ մնաց սառույցին գրված։

Հուսահատ կինն անգամ փորձել է կառավարության մոտ ինքնասպանության դիմել, սակայն ոստիկաններին հաջողվել է կանխել ինքնասպանության փորձը։

Փաշինյանի միջամտությունը գործին եղել է այնքանով, որ կնոջ դիմում նամակներն անցել են նույն օղակներով ու շղթայաձև պտույտից հետո դարձյալ գործը մնացել է օդից կախված։

Մի առիթով կինը մեզ հետ զրույցում նկատել էր, որ ոչ ոք չունի, և իր հույսը միայն Փաշինյանն է։ Այսօր արդեն նա ավելի է հուսահատվել՝ Փաշինյանը, վարչապետի կարգավիճակում տված իր առաջին խոստումը չկատարեց։

«Սա նրա առաջին գործն էր, առաջին խնդրանքը քաղաքացու կողմից, եթե նա տեր չի կանգնում իր տված խոստմանը, ուրեմն ինձ համար հեղափոխություն չի եղել՝ նույն ջուրն ա, նույն ջրաղացը, սայլը տեղից չի շարժվել»: