Վարչապետի անձնական ամբիցիաների պատճառով մերժվեց Եվրոպայից և Ամերիկայից տրված բացառիկ արժեքավոր առաջարկը. Աշոտ Գրիգորյան (տեսանյութ)

Դեռևս ս/թ մարտի 3-ին, երբ Հայաստանում գրանցվել էր կորոնավիրուսի առաջին դեպքը, ԵՀՄՖ նախագահ դոկտոր Աշոտ Գրիգորյանը նամակով դիմեց ՀՀ վարչապետին և առողջապահության նախարարին՝ առաջարկելով իր օգնությունը կորոնավիրուսի դեմ պայքարի ուղղությամբ։ Առաջարկությունը վերաբերում էր ամերիկյան դիվանագիտական ներկայացուցչությունների և ռազմաբազաների անձնակազմի անվտանգությունն ապահովող աշխարհի խոշորագույն և արհեստավարժ, մասնագիտացված ամերիկյան կազմակերպությունների կողմից անվճար օգնությանը՝ Հայաստանում կորոնավիրուսի տարածումը կանխելու համար։

Առողջապահության նախարարությունից ստացվեց նամակի պատասխան, որտեղ նշվում էր, որ չկա օգնության կարիք։

Սակայն ընդամենը դիտելով առողջապահության նախարարի կազմակերպած՝ արտերկրից ժամանած կորոնավիրուսով կասկածյալ հիվանդների դիմավորման խայտառակ տեսանյութը, որտեղ նախարարության՝ այլմոլորակայինի արտաքինով ու վիրաբուժական դիմակով «պաշտպանված» ներկայացուցիչը կասկածյալ վարակվածներին տաքսիներով ուղարկում էր տուն՝ վարակելու այլոց, պարզ էր դառնում, որ Հայաստանում կորոնավիրուսի դեմ պայքարը չէր իրականացվում պատշաճ մակարդակով։ Այս ցավալի ու զավեշտալի իրականության պայմաններում մերժվեց Եվրոպայից և Ամերիկայից տրված բացառիկ արժեքավոր մեր առաջարկը մի պարզ պատճառով․ գործեցին վարչապետի անձնական ամբիցիաները։

Հավելենք, որ ԵՀՄՖ նախագահը, ստանալով մերժում ՀՀ կառավարությունից, չնահանջեց իր մտադրությունից և դիմելով Եվրոպայի, Ռուսաստանի և Միացյալ նահանգների բոլոր հայկական կազմակերպություններին՝ առաջարկեց կոորդինացնել Հայաստան առաքվող դեղամիջոցների և բժշկական սարքավորումների խմբաքանակները Հայաստանի բնակչությունը կորոնավիրուսի արհավիրքից փրկելու համար։ Այդ գործընթացը կազմակերպելու նպատակով դոկտոր Գրիգորյանը կրկին նամակով դիմեց ՀՀ վարչապետին, սակայն նամակը մնաց անպատասխան։

Հիշեցնենք, որ Հայաստանում հունիսի 2-ի դրությամբ գրանցվել է կորոնավիրուսի 10,009 դեպք և 158 մահ։ Համեմատելու համար նշենք, որ Սլովակիայում առայսօր գրանցվել է կորոնավիրուսի 1,522 դեպք և ընդամենը 28 մահ՝ 5,5 մլն․ բնակչության դեպքում։ Սլովակիան դեռևս փետրվարի վերջից սկսել էր լուրջ միջոցառումներ կորոնավիրուսի դեմ պայքարի հարցում՝ խիստ հսկողություն սահմաններին, մարտի 9-ից վիրուսի մեկ դեպք հայտնաբերվելու հետևանքով փակվեցին անխտիր բոլոր ուսումնական հաստատությունները, արգելվեցին բոլոր մասսայական միջոցառումները, փակվեցին թանգարանները, պատկերասրահները և այլ կառույցներ։ Միևնույն ժամանակ, Հայաստանում, որը գտնվում էր աշխարհում կորոնավիրուսի ամենավտանգավոր կենտրոններից մեկի՝ Իրանի հարևանությամբ, վիրուսի դեմ կատաղի պայքար սկսելու փոխարեն՝ մարդիկ վարչապետի գլխավորությամբ մասնակցում էին հանրահավաքների։ Այսօր Սլովակիան, որը գրեթե հաղթահարել է կորոնավիորւսը, բացել է իր սահմանները հարևանների հետ, երկիրը վերադարձել է բնականոն կյանքին։

Որպես հավելում, նշենք, որ մեր ունեցած տեղեկություններով՝ Վրաստանի կառավարությունը, հաշվի առնելով Հայաստանում կորոնավիրուսի աճող բարձր տեմպերը, քննարկում է մինչև տարեվերջ Հայաստանի հետ սահմանը փակելու հարցը։

Այսքանից հետո, տեսնելով Հայաստանում վարակվածների ու մահերի օրեցօր աճող թվերը՝ ցավ ենք ապրում, որ, չնայած մեր հսկայական ջանքերին ու ցանկություններին՝ ՀՀ կառավարության անդամների անձնական ամբիցիաները վեր դասվեցին Հայաստանի կայունության ու հայ ժողովրդի առողջության շահերից, մեր բոլոր ձգտումները՝ ձեռք մեկնելու երկրին ու բնակչությանը՝ ի չիք դարձան վարչապետի ցանկությամբ և մնացին անկատար։