Beeline-ի աշխատակիցը սպասարկում իրականացնելիս ընկել է տանիքից, ստացել ոսկրային վնասվածքներ․ բուժումը չի փոխհատուցվել․ իմքայլականներն էլ հրաժարվել են օգնել (ֆոտո)

60-ամյա Գևորգ Դավթյանը «Վեոն Արմենիա»-ի (Բիլայնի) արդեն նախկին աշխատակից է։ Նա 40 տարի աշխատել է ընկերությունում, աշխատանքի ընթացքում ստացել վնասվածքներ ու ձեռք բերել առողջական խնդիրներ։ 

NEWSPRESS.am-ի հետ զրույցում Դավթյանը պատմեց, թե ինչպես է 2018 թ., աշխատանքի ժամանակ, ընկել է տանիքից և այսօր հայտնվել անելանելի վիճակում։

Նա մեզ հետ զրույցում նկատում է, որ «Բիլայնի» հետ պայմանագրով ամրագրված անվտանգ աշխատանքային պայմաններն ապահովված չեն եղել։ Ասել է թե՝ մեղքի, հետևաբար նաև պատասխանատվության բաժինն ընկնում է հենց «Բիլայնի» վրա, որի ղեկավար կազմը, Գևորգ Դավթյանի խոսքով, ամբողջությամբ չի կատարել իր պարտավորություններն ու չի փոխհատուցել ընթացիկ և հետագա բուժման համար։

Մեր զրուցակիցը պատմում է, որ սպասարկելիս է եղել տաքսի սերվիսի ֆիքսված հեռախոսահամարի գիծը և ընկել է սերվիսի պատասխանատուի կողմից իրեն տրամադրված աստիճաններից (սերվիսի պատասխանատուն ինքն է վերև բարձրացրած եղել լարը, քանի որ այն հավանաբար խանգարելիս է եղել)։

Թեև Գևորգ Դավթյանը զգուշացրել է, որ չի կարող միայնակ բարձրանալ և բացել կապած լարը, սակայն սերվիսի պատասխանատուն նրան խոստացել է օգնել և համոզել բարձրանալ։ Ու քանի որ չի կատարել իր խոստումը՝ Դավթյանը մնացել է անօգնական։

«Աստիճանը թիթեղի վրա էր դրված։ Ինձ թվում էր գոնե կգան, կբռնեն, բայց ոչ ոք չեկավ։ Աստիճանն սկսեց շարժվել, ընկա անհարթ տարածության վրա։ Ունեցա բազմաթիվ վնասվածքներ` հատկապես անհանգստացնող ու խնդրահարույց դարձած ողնաշարի և մեջքի ոսկորների կոտրվածքներ և գլխիս հասած վնասվածքներ»,- ասում է Դավթյանն ու հավելում, որ ինքն իրավունքն ուներ հրաժարվել, եթե աշխատանքային պատշաճ պայմաններ չեն առաջարկվում։

Նա վստահեցնում է, որ ամբողջական առողջացման և ապաքինման համար պատշաճ բուժօգնություն չի ստացել, քանի որ Բիլայնը հրաժարվել է հոգալ բուժման ծախսերը:

Դավթյանի խոսքով, «Սիլ Ինշուրանս» ապահովագրական ընկերությունը լիարժեք չի աջակցել, որպեսզի ժամանակին, ճիշտ ու լիարժեք բուժում իրականացվի և Դավթյանը դառնում է երրորդ կարգի հաշմանդամ:

««Սիլ Ինշուրանս»-ը կտրականապես հրաժարվում էր շարունակել իմ բուժումը»,- ասաց մեր զրուցակիցը: Բացի այն, որ Դավթյանը լիարժեք բուժօգնություն չի ստացել, նա նաև դժգոհ է ոստիկանների աշխատանքից, իսկ ավելի կոնկրետ՝ անգործությունից։

Գևորգ Դավթյանը պատմում է նաև, որ իրեն պատշաճ չեն հարցաքննել և թույլ չեն տվել ներկայացնել դեպքի մանրամասները։

«Օրինակ՝ երբ ուզում էի պատմեմ, որ աստիճանը ինձ տվել էր սերվիսի պատասխանատուն, ոստիկանը ինձ թույլ չտվեց շարունակել․․․ գործը այլ կերպ է ներկայացված ու ճիշտ չի ձևակերպված հարցը»,-պատմում է «Բիլայնի» նախկին աշխատակիցը։

Նրա գնահատմամբ՝ ստացել է իր դիմումին անհամահունչ, անհիմն, իր ներկայացրած փաստերին չհամապատասխանող, ավելին՝ հակասող, իրավախախտողների անօրինականությունները կոծկող և արդարացնող, իսկ իր իրավական վիճակն ավելի վատթարացնող պատասխաններ։ Դավթյանը վստահեցնում է, որ հենց դա է գոտեպնդել «Սիլ Ինշուրանս» ԱՊՊԱ ընկերությանը։

«Ես ոչ միայն չստացա ինձ հասանելիք առնվազն 1.5 միլիոն դրամի հատուցումը, այլև նույնիսկ ես չստացա իրենց փոխարեն իմ բուժման վրա կատարած` ՀԴՄ կտրոններով ներկայացված 150.000 ՀՀ դրամի ծախսերս: Իսկ Բիլայնը ավելի սանձարձակ դարձավ` ինձ անսպասելիորեն, հանկարծակի ազատեց աշխատանքից:

Նա նաև պատմեց, որ երբ 2013 թվականին «Քաղաքացիական պայմանագիր» քաղաքական կուսակցությունը  որպես հանրային-քաղաքական միավորում ձևավորվեց, նա ևս համալրել է ՔՊ շարքերը։ Ուստի 2018-ի ընտրությունների ժամանակ, չնայած ստացած տրավմաներին, աջակցել է ընտրություններին։

«ԱԺ ընտրությունների քարոզարշավին` ակնհայտ վատառողջ, հիվանդ վիճակում մասնակցել եմ և օգնել մեր պատգամավորների ընտրվելուն»,-հայտարարում է Գևորգ Դավթյանը և նշում, որ, իրավական պաշտպանվածություն չունենալով՝ դիմել է իմքայլական պատգամավորներին, որպեսզի վերականգնեն իր բուժվելու իրավունքը։

«Մինչև 2019 թ.-ի օգոստոս, բայց ոչ մի արդյունք։ Ունեցել եմ միայն մեծ ժամանակի վատնում և հուսախաբություն։ ԱԺ նախագահ Արարատ Միրզոյանին եմ դիմում գրել, դիմում եմ գրել նաև խմբակցության ղեկավար Լիլիթ Մակունցին։ Գործն ուսումնասիրել են, խոստացել, որ կօգնեն ու հետո ոչ մի պատասխան չեմ ստացել»,-պատմում է Գևորգ Դավթյանը։

Նույն դիմում-խնդրանքով նա դիմել է նաև ՔՊ վարչության անդամ Սուրեն Պապիկյանին։

60-ամյա տղամարդը, հենց աշխատանքի ընթացքում ստացած վնասների հետևանքով ոչ միայն չի փոխհատուցվում բուժման համար և չի ստանում աջակցություն իշխող կուսակցությունից, որին անդամակցել է, այլև այդ ընթացքում նաև զրկվում է աշխատանքից։

«Ինձ զրկեցին դժբախտ պատահարի համար հատուցում ստանալուց և իմ 40 տարվա մասնագիտությամբ` էլեկտրոմանտյոր աշխատելուց, քանի որ այն արդեն կրկնակի անգամ բարձր էր վարձատրվում և այդ պատճառով հիմնարկի ղեկավարությունը հաստիքս տվել էր ուրիշին:

Ստիպված, 2019թ.-ի օգոստոսին, իրավունքներիս պաշտպանության օրինականության համար հարյուր տոկոսանոց հույս հավատով դիմեցի մեր առաջնորդ-վարչապետին` Փաշինյանին (դիմում N 150/56172-2019)՝ «Վեոն Արմենիայի», «Սիլ Ինշուրանսի», «Աստղիկ» ԲԿ-ի, թիվ 13 պոլիկլինիկայի փաստացի կատարած անբարեխիղճ գործողությունների, իրավախախտումների, անօրինականությունների, կոռուպցիոն երևույթների դեմ»,-ասաց մեր զրուցակիցը և նշեց, որ հիշում է, թե ինչպես դիմումը տալիս՝ ասաց․ «Կփոխանցեք մեր զորավորին»։ Դավթյանը նշում է, որ հենց այդպիսին էլ միշտ պատկերացրել է Փաշինյանին՝ անթերի զորավոր մարդ, բայց հիմա նույն կարծիքը չի կարող հնչեցնել։

Ամեն դեպքում նա ուզում է հավատալ, որ գոնե այս հրապարակման միջոցով վարչապետ Նիկոլ Փաշինյանն այնուամենայնիվ կտեղեկանա կատարավածի մասին, ու կնպաստի վերականգնել իր իրավունքները՝ օգնելով ստանալ փոխհատուցումը։

Ընդհանուր առմամբ, Գևորգ Դավթյանի համար զարմանալի է, թե ինչու, գործին ծանոթանալով, բոլորը ձեռքները լվանում դրանից։ Նա իր ֆեյսբուքյան էջում նաև խնդրել է արձագանքել փաստաբանների, ովքեր կօգնեն իրեն այդ հարցում։ 

«Ես իրավունքներիս պաշտպանության համար վերջին տարբերակով դիմել եմ Հանրային Պաշտպանի գրասենյակ, բայց փաստաթղթերս` գործը չեն վերցրել, տարբեր պատճառաբանություններով, իսկ ինձ գործնական քայլ կատարելու համար մնացել է ընդամենը այս շաբաթվա ժամանակը»,-ասում է նա:

Հարկ է նկատել, որ դեպքի հետևանքով, Գևորգ Դավթյանը ձեռք է բերել մեջքի ոսկորների գանգրենայի և գլխի սուր ցավեր։ Նա գործազուրկ է և այլևս անաշխատունակ։

NEWSPRESS.am-ը տեղեկացնում է, որ վերոհիշյալ տեքստի մանրամասների հետ կապված առկա է ձայնագրություն։