Դատարանն արգելանք է դրել փոխվարչապետ Տիգրան Ավինյանի կնոջ գույքի վրա․ Hraparak.am

Hraparak.am-ը գրում է.

«Տեղեկացրել էինք, որ ուրոլոգ Գևորգ Գրիգորյանը հրապարակայնորեն արտահայտված վիրավորանքից պատիվը և արժանապատվությունը պաշտպանելու հայցով 03.04.2020թ.դիմել էր դատարան՝ ընդդեմ ՀՀ փոխվարչապետ, պարետ Տիգրան Ավինյանի կնոջ՝ Մարիամ Պահլավունու։

Հիշեցնենք, որ նման հայցի պատճառ կամ առիթ էր դարձել «Հրապարակի» հոդվածը, որում ներկայացրել էինք, որ Մարիամ Պահլավունին Գևորգ Գրիգորյանի մասին ասել էր․«Առանց դրա էլ բոլորը գիտեն ում շունն ա»։ Իսկ Գևորգ Գրիգորյանն էլ նախ պարետից պահանջել էր ներողություն խնդրել կնոջ փոխարեն, ապա այն չստանալով՝ դիմել էր դատարան։

Նշենք, որ 17.04.2020թ.,Երևան քաղաքի ընդհանուր իրավասության դատարանի դատավոր Գ. Թորոսյանը,Գրիգորյանի հայցադիմումը հետ էր վերադարձրել կից փաստաթղթերի անբավարարության պատճառով։ Սակայն պահանջվող փաստաթղթերը լրացվելուց հետո, հայցն ընդունվել է, և, ավելին, բավարարել է Գրիգորյանի փաստաբանի՝ միջնորդությունը հայցագնի՝ 1․000․000 ՀՀ դրամի չափով արգելանք դրել Մարիամ Պահլավունուն պատկանող գույքի վրա։

Դատաքննության օրը դեռ նշանակված չէ»։