Ո՞ւմ է ապուշի տեղ դնում ՀՀ վարչապետը

ՀՀ վարչապետ Նիկոլ Փաշինյանի համար ՀՀ հպարտ քաղաքացին դարձել է գործիք՝ իր առջև դրված բոլոր խնդիրերը լուծելու համար։ Եթե երկու տարի առաջ այդ քաղաքացին, որպես միջոց օգտագործվեց իշխանությունը զավթելու համար, հետո դարձավ գործիք Ազգային ժողովը պաշարելու համար, այնուհետև՝ զավթման ընթացքը շարունակվեց Սահմանադրական դատարանում, հիմա քաղաքացին դարձել է գործիք՝ բիզնեսմեններին աջակցելու համար։

Ստացվում է, որ եթե մի ամիս առաջ հայտարարվում էր, որ քաղաքացիները կարող են կորոնավիրուսի դեմ պայքարելու համար ինքնաշեն դիմակներ կրել ու խնայել գումար՝ առանց այն էլ այս սոցիալ-տնտեսական ծանր վիճակում, հիմա դա էլ չի կարելի անել։

Քաղաքացիները պետք է այդ դիմակները առնեն, քաղաքացիները պետք է օգտագործեն բացառապես գործարանային արտադրության դիմակներ։ Լսում ես կառավարության նիստն ու մտածում՝ լավ, ո՞ւմ է ապուշի տեղ դնում ՀՀ վարչապետը։

Ստացվում է՝ Հայաստանում բիզնեսմենները սկսել են դիմակներ արտադրել, դրան զուգահեռ էլ ներկրել են, ու հիմա ապրանքը շատացել է, կարող է չծախվել, մնալ ու վարչապետին այլ բան չի մնում, քան պահանջել քաղաքացիներից կրել միայն գործարանային արտադրության դիմակներ։

«Մենք եկանք այն համոզման, որ դիմակները պետք է դարձնել պարտադիր։ Հասկանալով գների բարձր լինելը՝ ասացինք, որ ովքեր հնարավորություններ ունեն, կարող են օգտագործել գործարանային արտադրության դիմակներ, իսկ ովքեր հնարավորություններ չունեն, կարող են օգտագործել տան պայմաներում կարված դիմակներ։ Հիմա մենք ունենք դիմակների գնանկում և պրոֆիցիտ։ Կարող ենք անցնել երրորդ փուլին՝ քաղաքացիներին կոչ անել, որպեսզի կրեն բացառապես գործարանային արտադրության դիմակներ»,- կառավարության նիստի ժամանակ ասաց վարչապետը։

Գուցե նա գործարանային արտադրության դիմակներ ասելով հասկացել է միայն «Տավուշ տեքստիլի» արտադրանքը, գուցե՝ այլ արտադրողներինը, հստակ չէ, բայց այսպես խոսել քաղաքացու հետ ու նրան պարտադրել գնել միան գործարանային արտադրության դիմակ, նույնն է, որ ասես՝ վարչապետը զբաղված է դիմակների արտադրության և իրացման մարկետինգով։

Ի՞նչ գործ ունի վարչապետը, որ սպառողին ասի՝ ինչ ապրանք պետք է նա սպառի՝ գործարանային, թե ինքնաշեն։ Խնդիր է դրված կրել դիմակ՝ քաղաքացին կրում է, իսկ թե դա որտեղ է արտադրվել, վարչապետին առհասարակ չպետք է հետաքրքրեր, իսկ եթե հետաքրքում է, ավելին՝ նա կառավարության նիստն օգտագործում է գործարանային արտադրության դիմակների գովազդ անելու համար, թույլ է տալիս մտածելու, որ այդ գովազդը հենց այնպես չի արվում։

NEWSPRESS.am