Լիդիանի վարձած պահակները պատրաստվում են տարհանել Ամուլսարի պահպաններին. ՀԲՃ-ն ահազանգում է

«Լիդիան Արմենիա» ընկերության վարձած պահնորդական ծառայության ներկայացուցիչները՝ համապատասխան տեխնիկայով զինված, պատրաստվում են գնալ Ամուլսարի դիմադրական կետեր, որպեսզի այնտեղից հանեն Ամուլսարի պահպանների կացարանները: Այս մասին ահազանգում է Հայկական բնապահպանական ճակատ (ՀԲՃ) քաղաքացիական նախաձեռնությունը։

«Հենց նոր ահազանգ ենք ստացել Ամուլսարից, որ Լիդիանի վարձած պահնորդական ծառայության ներկայացուցիչները համապատասխան ծանր տեխնիկայով պատրաստվում են Ամուլսարի դիմադրական կետեր գնալ, որպեսզի այնտեղից հանեն Ամուլսարի պահապանների կացարանները: ՀՀ ոստիկանություն / Police of the Republic of Armenia սա նաև ձեր ու նախկինում տեղի ունեցած դատական գործընթացների դեմ է։

Այս գործողությունները բացարձակ ապօրինի են, հերթական անգամ Լիդիանը իր նոր տերերով հանդերձ պրովոկացիաներ է հրահրում։ Դեռևս մի քանի ամիս առաջ մեր ուղարկած հարցմանն ի պատասխան ՀՀ ոստիկանությունը հաստատել էր, որ արված չափագրումների համապատասխան Ամուլսարի պահապանների կացարանները Լիդիանի տարածքից դուրս են գտնվում. սա ամրագրված է նաև ՀՀ Ոստիկանության և Լիդիանի միջև դատական գործընթացի փաստաթղթերում, և նույնիսկ Կանադական դատարանում Լիդիանի հետ կապված վարույթի փաստաթղթերում: Ահա Ոստիկանության պաշտոնական նամակի հղումը՝ http://www.armecofront.net/…/up…/2020/02/Amulsar-Police-.pdf

Այս պահին տեղի ունեցողը ոչ այլ ինչ է, քան բռնի և ապօրինի միջամտություն խաղաղ հավաքների իրավունքի իրացմանը: Նման գործողությունները նաև սադրանք են և հղի են նոր պահնորդական ընկերության կողմից բռնության հրահրելու փորձերով (մենք արդեն համոզվել ենք, որ նրանք ընդունակ են դրան):

Ամուլսարի պահապանների կացարաններն արդեն իսկ գտնվում են հենց մայրուղու ճամփեզրին: Դրանք ոչ մի մետր չեն կարող տեղափոխվել: Դիմադրությունն իմաստ ունի հե՛նց այդ վայրում, իսկ մասնավոր ընկերությունը չի կարող հավակնել տիրանալ անգամ մայրուղիների բուֆերային հատվածներին:

Տեղյակ կպահենք զարգացումների մասին, մինչ այդ պատրաստ լինենք մեր աջակցությունը ցուցաբերել Ջերմուկին, Գնդեվազին ու Ամուլսարին։

», – ասված է ՀԲՃ-ի ֆեյսբուքյան գրառման մեջ։