Խնդրում եմ ներողամիտ լինել․ քաղաքապետի խոսնակը գրառում է արել և արագ հեռացրել

Երևանի քաղաքապետի մամուլի խոսնակ Հակոբ Կարապետյանը ֆեյսբուքյան իր էջում գրում է կատարել, որ շատ կարճ ժամանակ անց՝ հեռացրել է։ Սակայն այդ գրառումը շատ արագ սկսեց պտտվել համացանցում։ Գրառման մեջ Հակոբ Կարապետյանն անդրադարձել է մոսկվաբնակ հայերին կողմից թուքին ծեծելու միջադեպին՝ փաստացի վիրավորելով սփյուռքում ապրող հայերին։

Ավելի ուշ նա պարզաբանել է, թե ինչու է արել այդ գրառումը։

«Սիրելի ֆեյսբուքյան ընկերներ,

Ով չգիտի, տեղեկացնեմ, որ շրջանակում երեւացող նշանը ցույց է տալիս, որ գրառումը արված է ՄԻԱՅՆ ընկերների համար, եւ դրանք մամուլում կամ հանրային այլ հարթակներում տարածելու համար չեն։ Սա մի «օպցիա» է, որը թույլ է տալիս սահմանափակել գրառման հասանելիության շրջանակը, եւ որքան էլ լայն լինի այդ շրջանակը, այնուամենայնիվ, այն սահմանափակ է։ Խնդրում եմ՝ բարեխիղճ լինել, հարգել անձնական տարածքի իրավունքը եւ ընկերների շրջանակից դուրս չհանել նման գրառումները. դրանք սովորաբար աշխատանքային ժամից դուրս են արվում, անձնական, ընտանեկան կյանքին վերաբերող բովանդակություն ունեն կամ որոշակի հանրային հետաքրքրություն ներկայացնող հարցերի վերաբերյալ ԱՆՁՆԱԿԱՆ կարծիք են փոխանցում։

Ամեն դեպքում, եթե նմանատիպ գրառումներում արտահայտված որեւէ միտք վիճահարույց կամ վիրավորական է թվում, խնդրում եմ ներողամիտ լինել՝ ընդունելով հանդերձ անձնական կարծիք ունենալու իմ իրավունքը։ Շնորհակալություն։

Հ. Գ. Իսկ նախորդ մասնավոր գրառումը, որը շահարկումներից խուսափելու համար փակում եմ, վերաբերում էր բացառապես նրանց, ովքեր.

1. հանուն պորտաբույծ կյանքի (որոշները՝ բանակում ծառայությունից խուսափելու համար) լքել են հայրենիքը եւ

2. իրենց ագրեսիվ, անհեռանկար ու անպատվաբեր վարքով խաթարում են իրենց լքած երկրի իմիջը, թուլացնում նրա դիրքերը եւ անուղղակիորեն սպառնում սփյուռքում ապրող մեր եղբայրների անվտանգությանը»: