Աշխարհազորն ու ԵԿՄ֊ն լրիվ տարբեր բաներ են. կընդգրկվեն պահեստազորում չներառված, մինչև 70 տարեկանները. Բալայան

«Երբ բանակն օգնության կարիք ունենա, աշխարահզորն իր դիրքում է լինելու»: Այս մասին լրագրողների հետ հանդիպմանը հայտարարեց պաշտպանության փոխնախարար Գաբրիել Բալայանը։ 

Նա հիշեցրեց 2016-ի ապրիլյան պատերազմն ու այս ամառ տավուշյան դեպքերը, երբ ստեղծվել էին անկանոն խմբավորումներ և նկատեց, որ Հայաստանում աշխարհազորի ստեղծման նախաձեռնության նպատակն է պատրաստել և օգտագործել բնակչությանը հնարավոր մարտական գործողությունների ժամանակ, ինչպես նաև կիրառել նրանց հմտություններն ու գիտելիքները։

«Անկանոն խմբավորումները, կարելի է ասել, ավելի շատ խանգարում էին զինված ուժերի գործողություններին, քան օգուտ էին տալիս. hավաքվել 30-30, կամ 50 հոգով ու գնալ առաջնագիծ, նախ և առաջ պատասխանատվություն է պարենային, սպառազինության ապահովման ու այլ հարցերի վերաբերյալ»,-ասաց փոխնախարարը:

Բալայանի խոսքով, աշխարհազորում ընդգրկվելու են պահեստազորում չներառված, մինչև 70 տարեկան քաղաքացիները։

«Նրանք զորակոչվելիս արդեն զինծառայողի կարգավիճակ են ձեռք բերելու, ստանալու են համազգեստ, մարտական առաջադրանք և ամբողջ ծավալով օգտվելու համապատասխան սոցիալական երաշխիքներից։ Սա հայկական մոդել է, մենք ուսումնասիրել ենք տարբեր երկրների փորձը, գտնում ենք, որ այս փուլի համար առաջարկված մոդելն օպտիմալ տարբերական է, ստանում են զենքը, մասնակցում գործողություններին, հետ վերադարձնում»,-մանրամասնեց բանախոսը՝ ավելացնելով, որ վերապատրաստումների ծավալների ու պարբերականության մասին ավելի ուշ հայտնի կլինի։

Հարցին, թե աշխարհազորի ստեղծումից հետո ի՞նչ կարգավիճակում է լինելու Երկրապահ կամավորականների միությունը, Բալայանը նկատեց, որ դրանք լրիվ տարբեր բաներ են: ԵԿՄ֊ն կազմակերպություն է` իրավաբանական անձ, որն իրականացնում է կանոնադրությամբ նախատեսված սոցիալական, մանկապատանեկան ծրագրեր:

«Աշխարահզորը իրավաբանական անձ չէ, եթե կազմավորվի, այն դառանալու է զինված ուժերի ստորաբաժանում։ Եթե նույնիսկ կան դժգոհություններ, ապա դրանք անհիմն են։ Աշխարհազորն ու ԵԿՄ֊ն կարող են լինել իրար փոխլրացնող, եթե կան դժգհոհություններ, կարծում եմ, դրանք շուտով կփարատվեն»,-ասաց Բալայանը։