Երբեմնի վաճառականից՝ տեսչական մարմնի պետ․ Սևանի ափին քեֆ-ուրախություն է․ «շեֆին» շնորհավորում են

NEWSPRESS.am-ի տեղեկություններով, այս պահին Սևանի ափին Բնապահպանության և ընդերքի տեսչական մարմնի անդամները նշում են իրենց ղեկավարի նշանակումը։

Նորանշանակ պետի՝ Գնել Հասրաթյանի նշանակումը տոնում են Գեղարքունիքի մարզի Ծովինար գյուղի հարևանությամբ գործող «Garden Inn»-ում։

Կառավարության կայքէջից կարելի է տեղականլ, որ վարչապետի որոշմամբ, Գնել Հասրաթյանը երեկ՝ սեպտեմբերի 11-ին է նշանակվել տեսչական մարմնի պետի պաշտոնում։ Թերևս նրա բախտը բերել է այնքանով, որ նրա նշանակումը համընկավ կարանտինի հետ կապված սահմանափակումների մեղմացման հետ և հիմա ծանթո-մտերիմներով Սևանի ափին Հասրաթյանը կարող է ազատ «քեֆ քաշել»։

Բայց նրա բախտը թերևս միայն այդքանով չի բերել։ Մեր տեղեկություններով, Հասրաթյանի կենսագրության որոշ, հավանաբար իր համար ոչ այնքան պատվաբեր էջեր, բաց են թողնվել կառավարության պաշտոնական կայքէջում զետեղված նրա ընդհանուր կենսագրությունից։

Իսկ ավելի կոնկրետ, պաշտոնական կենսագրության մեջ նշված է պարզապես, որ Հասրաթյանը 2009-2019թթ․ աշխատել է մասնավոր ընկերությունում որպես մենեջեր։ Մինչդեռ, մեզ հասած տեղեկություններով նա 2009 թվականից մինչև 2013 թվականը, «Մարմարի աշխարհում» աշխատել է որպես վաճառող, գանձապահ, իսկ 2014-ից 2019 թվականը «Սանար» ընկերությունում որպես տնօրեն, մենեջեր:

2020 թվականի փետրվարի 4-ից էլ զբաղեցրել է տեսչական մարմնի ղեկավարի օգնականի հաստիքը:

Այնպես որ, երբեմնի վաճառականի համար, այսօր արդեն տեսչական մարմնի ղեկավարի պաշտոնը իրական տոնի առիթ է, հատկապես, որ այս նշանակումը, կարելիէ ասել նաև նրա ծննդյան նվերն էր։ Դրանից 3 օր առաջ էլ Գնել Հասրաթյանի ծննդյան օրն էր։