Երեւանի գլխավոր ճարտարապետի պաշտոնը կարող է այլեւս չլինել. Հայկ Մարության (տեսանյութ)

«Ես հիմա կարող է մի փոքր սենսացիոն բան ասեմ, բայց ես ընդհանրապես մտածում եմ, որ Երևանի գլխավոր ճարտարապետի պաշտոնը պետք է որոշակի մոդիֆիկացիայի, փոփոխությունների ենթարկվի, և դա կարող է այլևս չլինել գլխավոր ճարտարապետ»,- ֆեյսբուքյան իր էջում տեղադրած տեսանյութում ասում է Երևանի քաղաքապետ Հայկ Մարությանը՝ պատասխանելով հարցին, թե արդյո՞ք ունի Երևանի գլխավոր ճարտարապետի պաշտոնի համար իր նախընտրելի թեկնածուն:

Նա նշում է, որ դա կարող է մի մարմին, մի խորհուրդ լինի, մի այլ բան, որի շուրջ հիմա աշխատանքներ են տանում։

Հիշեցնենք, որ Երևանի գլխավոր ճարտարապետ Արթուր Մեսչյանը քաղաքապետ Հայկ Մարությանի որոշմամբ օգոստոսի 17-ին ազատվել էր պաշտոնից։

Հարցին՝ ե՞րբ ամբողջությամբ մայրաքաղաքը կազատվի գազելներից, Հ.Մարությանն ասում է. «Պրոցեսը սկսել ենք, 100 մինի-ավտոբուսի մրցույթը կայացել է, ավտոբուսների քանակը 850-950 պետք է լինի։ Մենք պրոցեսը սկսել ենք, այս պրոցեսը կախված չէ միայն քաղաքապետարանից:

Պրոցեսին շատ լուրջ մասնակցություն պետք է ունենա կառավարությունը, որովհետև առանց կառավարության այն գումարի մասին, որի մասին խոսում ենք, համայնքն իր ուժերով չի կարող։

Այս առումով գիտեք, որ կառավարության և Եվրոպական զարգացման բանկի հետ համատեղ մենք տենդերը դրել ենք 12 մետրանոց ավտոբուսին: Եղել է երկու մասնակից, չեմ համապատասխանել պայմաններին, դրա համար տենդերը համարվել է չկայացած: Հիմա աշխատում ենք նոր տենդերի վրա»։

Ինչ վերաբերում է մետրոյի նոր կայարանի կառուցմանը, քաղաքապետն ասում է. «Փորձել ենք ներգրավել մասնավորի, որպեսզի պետության վրա չլինի այդ հոգսը, բայց այն պայմանները, որ մեզ առաջարկել են տարբեր մասնավոր ընկերություններ, այնուամենայնիվ, իմ կողմից գնահատվել է ոչ այդքան բարենպաստ քաղաքի ու պետության համար: Կառավարության հետ եկել ենք ընդհանուր հայտարարի, որ հենց պետությունը կկառուցի այդ կայարանը: Պետական միջոցներով դա կարվի: Այս պահին մշակվում է նախագծի մրցույթը: Դրանից հետո կունենանք նախագիծ:

Մենք հաշվարկել ենք, խոսքը մոտ 35 մլն դոլարի մասին է: Կառավարությունը հավաստիացրել է, որ այդ գումարը կարող է տրամադրել մետրոյի կայարանի կառուցման համար»։