Ինչու ԱԱԾ-ն հիմա հիշեց Իշխան Զաքարյանին

Ազգային ժողովի Բարգավաճ Հայաստան խմբակցության նախկին պատգամավոր եւ Վերահսկիչ պալատի նախկին նախագահ Իշխան Զաքարյանի անունն այսօր կրկին հայտնվեց մամուլի ուշադրության կենտրոնում:

Զաքարյանը եւ այլ անձինք ԱԱԾ են հրավիրվել ժամանակին ձեռք բերած հողատարածքների օրինականությունը ստուգելու նպատակով։ ԱԱԾ-ից այլ մանրամասներ չեն հաղորդում Զաքարյանի գործի մասին:

Անկախ այդ մանրամասների, պարզ է, որ Ծառուկյանի երբեմնի թիմակիցը իրավապահների ուշադրության կենտրոնում է հայտնվել Գագիկ Ծառուկյանի կողմից հայտարարված կառավարության հրաժարականի պահանջի կոնտեքստում:

Ամբողջ ամառ ԲՀԿ-ական պատգամավորներն ահազանգում էին իրենց գաղտնալսելու, ստուգելու, իրենց ազգականներին հետեւելու մասին: Ակնհայտ էր, որ այդ ամենն անհետեւանք չի մնա:

Որքան ակտիվանա Ծառուկյանն, այնքան կշատանան նրա հետ առնչված մարդկանց նկատմամբ քրեական գործերն ու ԱԱԾ-ականները:

Սա քաղաքական ընդդիմադիրներին լռեցնելու հերթական էժան շոուն է, որը շարունակում է մնալ որպես միակ աշխատող տարբերակ, քանի որ Ծառուկյանը սկսել է հանդիպումների շարք մարզերում, որոնք բազմամարդ են ու չեն կարող չանհանգստացնել իշխանությանը:

Այժմ պետք է հանրության ուշադրությունը շեղել սոցիալ-տնտեսական խնդիրներից եւ զսպել Ծառուկյանին, իսկ այս ամենը կարելի է անել գործի դնելով ռեպրեսիվ մեքենան:

Աշնանը իշխանության ընդդիմախոսներն օրակարգ են ձեւավորում Փաշինյանի վաղաժամ հեռացման համար, իսկ իշխանությունը' ձերբակալութունների:

NewsPress.am