Ամնեզիայով տառապողը

Ազգային ժողովի ընդդիմադիր խմբակցությունները դեռևս մի քանի ամիս առաջ Ազգային ժողովի նախագահ Արարատ Միրզոյանին էին ներկայացրել կոնորավիրուսի դեմ պայքարի ուսումնասիրության համար քննիչ հանձնաժողով ստեղծելու մասին դիմում։ Հանձնաժողովի ստեղծմանը բավարարում էին ընդդիմադիր խմբակցությունների պատգամավորների ստորագրությունները, և այդ հանձնաժողովը ստեղծվել էր իրավունքի ուժով։

Այսօր խորհրդարանում քննարկվում էր հանձնաժողովի անդամների կազմը հասատատելու մասին նախագիծը։ Այս հարցը շատ ծանր էին տանում «Իմ քայլը» խմբակցության պատգամավորները, որոնք, այսպես, թե այնպես, հանձնաժողովում լինելու են մեծամասնություն։

Ազգային ժողովի փոխնախագահ Լենա Նազարյանը, որն այդ պաշտոնում այդպես էլ այս երկու տարիների ընթացքում աչքի զարնեց միայն ու միայն էկրանից պատգամավորների անուննեը կարդալով, նախագիծը ներկայացնող Էդմոն Մարուքյանին հարց ուղղեց՝ իսկ քննիչ հանձնսաժողովը ուսումնասիրելո՞ւ է արդյոք ընդդիմադիրների արած իրար հակադրվող ելույթները կորոնավիրուսի տարածման ժամանակ սահմանները բացել-չբացելու, արտակարգ դրություն հայտարարելու կամ չհայտարարելու մասին։

Ազգային ժողովի փոխնախագահին թվում է, որ կորոնավիրուսի խայտառակ ցուցանիշ ունենալու մեղավորներն ընդդիմադիրների հայտարարություններն են, և ոչ թե իր թիմի տգիտությունը։

Մի կողմ թողնենք այն, որ մարդ նվազագույնը պետք է տառապի հիշողության կորստով, որ մոռանա «Կորոնավիրուսն ո՞ւմ շունն է, թթի օղիով կախտահանենք, թեյ խմենք՝ կանցնի, դիմակ կրելը չի օգնում» և այսպիսի բազմաթիվ թևավոր դարձած արտահայտություններ։

Մի կողմ թողնենք այն, որ Լենա Նազարյանի մտքից թռել է, թե ինչպես էին իրենք «Այո»-ի քարոզարշավ անում այն դեպքում, երբ ինչպես Նորքի ինֆեկցիոն հիվանանոցի արդեն նախկին տնօրեն Դավիդյանցը բացահայտեց՝ կորոնավիրուոսով վարակակիր Հայաստանում եղել է մարտ ամսից շատ առաջ։

Խնդիրը Նազարյան Լենայի մոտ նկատվող ամնեզիան չէ, այլ այն, որ իշխանությունը իր չարածի համար անընդհատ մեղավորներ է փնտրում՝ նախ փնթի անվանում մեր քաղաքացիներին, հետո անգիտակից, որ չեն գիտակցում վարակի վտանգը, իսկ հիմա մեղավոր են արդեն ընդդիմադիրները, որոնք ամեն օր ահազանգում էին իրավիճակի լրջությունը չպատկերացնող իշխանության տապալումները։

Ամեն գնով սեփական պարտությունն ուրիշին վրա բարդելը դառնում է այս իշխանության մոտ խրոնիկ և այս ախտը այնքան խորն է արմատներ գցել, որ հասել է անգամ քաղաքականությունից բան չհասկացող Լենա Նազարյանին։

Տիկնոջը պետք է խորհուրդ տանք ձեռքին գրված թղթի վրայից հարցերը կարդալուց առաջ, գոնե մեկ վայրկյան ստոպ տալ, նայել հայելու մեջ ու ամաչել, պարզապես ամաչել։

NewsPress.am