Ես հեղափոխական թիմի առաջնորդներից եմ․ թող հրաժարականներով ինձ չվախեցնեն, ես չեմ վախենում դրանից․ Արայիկ Հարությունյան (տեսանյութ)
Եթե իմ հրաժարականի հիմքեր լինեն, ապա ես ինքս մեկ րոպե ավել չեմ մնա այս պաշտոնին և ինքս դիմում կգրեմ: Այդ մասին այսօր մամուլի ասուլիսի ժամանակ ասաց Կրթության, գիտության, մշակույթի և սպորտի նախարար Արայիկ Հարությունյանը՝ մեկնաբանելով իր հրաժարականի պահանջը «Լուսավոր Հայաստան»-ի կողմից, ինչպես նաև այն, որ ավտոերթեր են կազմակերպվում՝ նրա հրաժարականի պահանջով:
Ըստ նրա՝ այդ բողոքները կապված են այն մեծ ռեֆորմների փաթեթի հետ, որն իրականացվում է:
«Եվ որոշ քաղաքական շրջանակների մտահոգությունը կապված է այն հանգամանքի հետ, որ այս բարեփոխումների ընթացքում և արդյունքում մենք ունենալու ենք մի սերունդ, որն այլևս իրենց հենքը և հիմքը չի հանդիսանալու և լինելու է քննադատող, վերլուծող: Իսկ քննադատող, վերլուծող սերունդը, եթե վերլուծի այդ շրջանակների գործունեությունը, ապա միանգամից որոշում կկայացնի, որ երբևէ որևէ առիթով այդ շրջանակներին չի սատարելու: Եվ տարբեր շղարշների տակ, կեղծ արժեքների անվան տակ պայքար իրականացնող խմբերը այլևս զրկվելու են մեր հասարակության մեջ որևէ աջակցությունից: Հիմա էլ առանձնապես շատ քիչ աջակցություն ունեն, այդ դեպքում ընդհանրապես չեն ունենալու»,- նշեց նա:
Հարությունյանն ասաց, որ խնդրում է իր գործընկերներին ամպագոռգոռ հայտարարություններով ու հրաժարականներով իրեն չվախեցնել, որովհետև ինքը չի վախենում դրանից:
