Երբ զինվորի հացը գողանալու մասին գոռացողը թքում է այդ զինվորների ու նրանց ծնողների խնդիրների վրա

2018 թվականի իշխանազավթումից հետո Հայաստանում փող դնող ներդրողները հավաքեցին իրենց փողերն ու հեռացան մեր երկրից, իսկ օտարերկրյա ներդումների հարցում մենք նախորդող երկու տարում ունենք զրոյական ցուցանիշ։ Երկրում ստեղծվել է մի իրավիճակ, որ պետությունը քաղաքացու թոշակն ու նպաստը տալու համար անցել է արտաքին պարտքն ավելացնելու ամենահեշտ տարբերակին՝ վարկեր է վերցնում ոչ թե երկրում ենթակառուցվածքներ զարգացնելու, այլ նրա համար, որ կարողանա իր ընթացիկ ծախսերը փակել։

Տնտեսագետները հայտարարում են, որ երկիրը կանգնած է տնտեսական շատ խոր ճգնաժամում հայտնվելու խնդրի առաջ և հրատապ պետք է քայլեր ձեռնարկել կոլապսի մեջ չհայտնվելու համար։ Իսկ ի՞նչ է անում վարչապետ Փաշինյանը․․․ ի պատասխան այս  պատկերի՝ ֆեյսբուքում թվեր է նկարում՝ ստեղծելով գործ անելու էժանա իմիտացիա։

Կառավարության ղեկավարը փակել է աչքերը ու չի տեսնում իր պատուհանի տակ բողոքի ակցիա անող հարյուրավոր քաղաքացիներին։ Մեկը բղավում է, որ մաքսազերծման նոր կանոններն ու հագուստի թանկացումը բերելու են իր փոքր բիզնեսի փակմանը, մյուսը խաղողագործ է ու տեսախցիկների առաջ պատմում է, որ 100 դրամով մթերված խաղաղը իրեն չի տալիս անգամ ցամաք հաց ուտելու հնարավորություն, ու այլ բան, քան Հայաստանից արտագաղթն է, չի մնում։

Փաշինյանը փակել է աչքերը ու որոշել զբաղվել իր սիրելի գործով՝ թքած ունենալով իրեն իշխանության աթոռ նվիրած ու այսօր խնդիրների մեջ խեղդված քաղաքացիների վրա։
Փաշինյանի համար Հայաստանում տնտեսական վիճակը օր օրի նոր թափով լավանում է և, եթե մեկ օր առաջ վարչապետը իր էջում գրել էր, որ 2020թ. հունվար-հուլիսին Հայաստանից ելակ-մոշ-հաղարջ ապրանքախմբի արտահանումը աճել է 166 տոկոսով. արտահանվել է 5.5 միլիոն դոլարի արտադրանք, ապա այսօր էլ շարունակել է տնտեսական ցուցանիշներով կերակրել պողոսներին ու հայտնել ավետիս՝ այս անգամ ոչխարաբուծության մասին․․․

«Շարունակելով տնտեսական բարդությունների ֆոնին տնտեսական լավ լուրերի թեման, արձանագրենք, որ 2020 թվականի հունվար-հուլիս ամիսներին Հայաստանից կենդանի ոչխարի եւ այծի արտահանումը նախորդ տարվա նույն ժամանակահատվածի համեմատ աճել է 256 տոկոսով. արտահանվել է շուրջ 41 հազար գլուխ մանր եղջերավոր կենդանի, ընդհանուր առմամբ շուրջ 3.4 միլիոն դոլարի: Այս աճը ուղիղ արդյունք է կառավարության ձեռնարկած մի շարք քայլերի եւ մանր եղջերավոր անասունների արտահանումը օգուտներ է բերում բազմաթիվ տնտեսվարողների, ովքեր անսացել են «ոչխար պահելու» իմ հորդորներին»,-գրել է նա։

Իր հորդորների դրական էֆեկտը փաստորեն զգում է միայն ինքը՝ Փաշինյանը, իր ընտնիքն ու ծանոթ բարեկամները, իսկ հպարտ քաղաքացին ու անգրագետ Պողոսը կքում են բեռի տակ։

Ու թքած, որ բողոքի ակցիա անող գյուղացին հայտարարում է, որ չի կարողանում զինվոր պահել, փող չունի, թքած, որ աղքատությունը գլխում հաղթահարել չկարողացած գյուղացին վարկերի տակ ճկռելով խաղող է աճեցրել ու այսօր այդ բերքը չի կարողանում իրացնել այնպես, որ գոնե իր արած ծախսերը հանի։

Թքած բոլորի ու բոլոր խնդիրների վրա. սա է ճանապարհը, որը միակն է իշխանությունը պահելու, դրանից առավելագույնս օգտվելու, փող աշխատելու, ուրիշի հաշվին կայանալու, ամբողջ կյանքում չտեսածն այսօր կլանելու։

NEWSPRESS.am