ԵԱՀԿ համանախագահների կոչը Հայաստանին և Ադրբեջանին

«Մենք ողջունում ենք Ադրբեջանի նախագահ Իլհամ Ալիևի և Հայաստանի նախագահ Սերժ Սարգսյանի առաջիկա հանդիպումը, որը կայանալու է ԵԱՀԿ Մինսկի խմբի համանախագահների հովանու ներքո։ Վերջին շրջանում տեղի ունեցող սրացման ֆոնին կոչ ենք անում կողմերին կրկին հավատարմություն ցուցաբերել հակամարտության խաղաղ կարգավորման գործընթացին և բանակցային ուղիով հարթել ամեն տեսակի անլուրջ թյուրըմբռնում: Կողմերը պետք է եկող տարի ավելի ակտիվ շարունակեն երկխոսությունը»,- ԵԱՀԿ պաշտոնական կայքը տարածել է ԵԱՀԿ Մինսկի խմբի համանախագահ երկրների պատվիրակությունների ղեկավարների՝ ԱՄՆ պետքարտուղար Ջոն Քերիի, Եվրոպայի հարցերով Ֆրանսիայի պետքարտուղար Հարլեմ Դեսիրի և Ռուսաստանի արտգործնախարար Սերգեյ Լավրովի համատեղ հայտարարությունը:
Հայտարարությունում նաև անդրադարձ է կատարվել ստատուս քվոն անկայուն լինելուն:

«Հատկապես դատապարտում ենք ականանետների և այլ ծանր զենքի կիրառումը և ցավ հայտնում, որ դրանց կիրառման հետևանքով տուժում է խաղաղ բնակչությունը։ Անմեղ մարդկանց մահվանն ու տառապանքներին արդարացում չկա։ Ղարաբաղյան խնդրի կարգավորումը ռազմական լուծում չունի։ Մենք խստագույնս կոչ ենք անում կողմերին նվազեցնել լարվածությոնն ու պահպանել մարդկանց կյանքերը: Բացի այդ, Հայաստանի և Ադրբեջանի ժողովուրդների միջև վստահության ստեղծման համար պետք է երկխոսություն անցկացվի։ Կողմերին կոչ ենք անում աշխատել համանախագահների հետ ծրագրերի աջակցման ուղղությամբ»,- ասված է հայտարարությունում։

Անդրադառնալով անցած տարի համանախագահների և Միսկի խմբի ձևաչափին հասցեագրված մեղադրանքներին՝ համանախագահները նշել են, որ Մինսկի խումբը հակամարտող կողմերի ընդունած միակ ձևաչափն է։ Նշվում է, որ ցանկացած մեղադրանք հանդիսանում է փորձ՝ թաքցնելու այն փաստը, որ Ադրբեջանում ու Հայաստանում քաղաքական կամք չի դրսևորվում հակամարտության խաղաղ կարգավորման հասնելու համար։
Պատվիրակության ղեկավարները ևս մեկ անգամ նշել են, որ իրենց ընդհանուր նպատակը մեկն է՝ տևական խաղաղության ձեռքբերումը, որի համար կողմերի հետ սերտորեն պետք է գործակցել: