Ձեր երեխաները մեր երեխաներն են, մի անհանգստացեք. Արցախում վիրահատող բժիշկ. ՖՈՏՈ

Պատերազմի հենց ամենասկզբից Արցախ մեկնած օրթոպեդ-վնասվածքաբան Արա Այվազյանը իր ֆեսյբուքյան էջով ուղերձ է հղել մարդկանց. «Սիրելի հայրենակիցներ, ինչպես գիտեք պատերազմի առաջին օրն իսկ մեկնեցի Արցախ՝ սահմանամերձ հիվանդանոցներից մեկում օգնելու մեր վիրավոր զինվորներին ու քաղաքացիներին: Ուզում եմ շեշտել, որ Արցախի հիվանդանոցները այս պահին հագեցած են բոլոր անհրաժեշտ ժամանակակից սարքավորումներով ու դեղամիջոցներով մեր քաջ հայորդիներին, քաղաքացիներին արագ ու արդյունավետ օգնություն ցույց տալու համար: Անգամ հրթիռակոծությունների պայմաններում մեր թիմը բոլոր այս բոլոր օրերին շարունակել է աշխատել, ճիշտ է վիրահատում ենք նկուղային պայմաններում, սակայն ամենալավ և ամենաժամանակակից բուժօգնությունն է ցույց տրվում վիրավորներին: Սիրելի մայրեր, մի անհանգստացեք Ձեր երեխաների ու հարազատների համար, նրանք ապահով ձեռքերում են:

Ձեր երեխաները մեր երեխաներն են: Բոլոր բժիշկները աշխատում են մեծ պատրաստակամությամբ, որպեսզի յուրաքանչյուր զինվոր ստանա պրոֆեսիոնալ ու ժամանակակից բուժում, ու առավելագույնս արագ ապաքինվի: Մեր հնարավորությունները թույլ են տալիս աշխատել անգամ բարդ վնասվածքների հետ: Մեր ոգին բարձր է ու անկոտրուն: Մեր զինվորներն են էլ ուղղակի ապշեցնում են իրենց քաջությամբ ու սխրանքներով: Մենք վստահ ենք մեր զինվորների ուժի ու կարողությունների վրա: Ընկճումը տեղ չունի մեր շարքերում:

Շատ ուժեղ զգում ենք Ձեր սերը,հավատն ու աջակցությունը, որոնք մեզ դարձնում են անպարտելի: Ու եթե նույն ոգևորվածությամբ, նվիրվածությամբ ու վստահությամբ գործեն բոլորը թե առաջնագծում, թե թիկունքում, մենք անպարտելի կլինենք»:

 #ՀԱՂԹԵԼՈՒԵՆՔ

#ոչ_ագրեսիային

Կարող եք նաև հետևել այս հղմամբ