Հայաստանի պանրագործները ԵՏՄ արտահանումից մեծ հույսեր չունեն

«Հայ պանրագործները մեծ ակնկալիներ ունեին ԵՏՄ անդամակցությունից, սակայն այժմ մեծ հույսեր չունեն»:

Այս մասին newspress.am-ի հետ զրույցում ասաց Հայաստանի պանրագործների միության նախագահ Արմեն Գիգոյանը:

Ըստ նրա` Հայաստանի պանրագործները արտահանման ռեսուրսներ ունեն, սակայն, կապված Ռուսաստանի ռուբլու տատանումների հետ, արտահանումը` հատկապես մեծաքանակ, չի արդարացվում:

Հատկանշական է, որ Հայաստանը տարեկան արտադրում է շուրջ 20 000 տոննա պանիր, որից մոտ 1500 տոննան արտահանվում է: Հիմնականում դրանք չանախ, լոռի տեսակներն են: Արտահանվում է նաև պանրի հումք, որից ՌԴ-ում հալած պանրիկներ են պատրաստում:

Վերջին տարիներին արտահանման այս քանակը գրեթե չի փոփոխվում: 2015թ-ի վերաբերյալ Ա. Գիգոյանը կանխատեսումներ չարեց, նշելով, որ այս տարի ծավալը հնարավոր է մի փոքր նվազի. «Հայաստանը կարող է արտահանել մինչև 3000 տոննա պանիր: ԵՏՄ երկրներ արտահանումից Հայաստանը չի կարող միջին գնային սեգմենտից ցածր պանիր առաքել»,- ասաց Գիգոյանը:

Նշենք, որ օրերս ՀՀ գյուղատնտեսության նախարարությունում ԵՏՄ երկրներ գյուղմթերք արտահանելու խնդրով խորհրդակցություն էր հրավիրվել, որին մասնակցել էին ոլորտի տարբեր կազմակերություններ, սակայն պանրագործների միությունը հրավիրվածների ցուցակում չէր:

«Ինձ անտեսումն են, գուցե սիմպատիայի հարց է»,- կես կատակ ասաց պանրագործների միության նախագահը: