Վիտալի Բալասանյանը հանդիպել է Նիկոլ Փաշինյանին. 168.am

Արցախի հերոս, գեներալ Վիտալի Բալասանյանն այսօր Երևանում հանդիպել է ՀՀ վարչապետ Նիկոլ Փաշինյանին, ներկայացրել ինչ-ինչ առաջարկներ: Այս մասին հայտնում է 168.am-ը իր հավաստի տեղեկություներով:

168.am-ի հետ զրույցում ՀՀ վարչապետի մամուլի խոսնակ Մանե Գևորգյանը հարցին՝ եղե՞լ է նման հանդիպում, պատասխանել է. «Չունեմ նման տեղեկություն, որ հաստատեմ կամ հերքեմ»:

Մենք փորձեցինք տեղեկության վերաբերյալ պարզաբանում ստանալ նաև Վիտալի Բալասանյանից, սակայն մեզ չհաջողվեց կապ հաստատել նրա հետ:

Հիշեցնենք, այսօր Վիտալի Բալասանյանը կոչ-հայտարարությամբ էր հանդես եկել՝ դիմելով ողջ հայությանը, որում ասվում էր․

«Հայրենակիցներ,

2020թ. սեպտեմբերի 27-ին Ադրբեջանի Հանրապետությունը, Թուրքիայի բացահայտ դրդմամբ, լայնամասշտաբ պատերազմ է սկսել Արցախի Հանրապետության սահմանի ամբողջ երկայնքով։

Մեկ ամիս է` հայ մարդը կյանքի ու մահվան կռիվ է մղում ոխերիմ թշնամու դեմ։

Այս օրհասական պահին իմ կոչն եմ ուղղում Արցախում, Հայաստանում և արտերկրում բնակվող բոլոր արցախցիներին, իմ մարտական ընկերներին ու ողջ հայությանը. վտանգված է մեր պետությունն ու պետականությունը, մեր հայրենիքը, Արցախն ու հայությունը, այժմ թանկ է ամեն րոպեն` բոլորս ի զեն»։