Այսօր արցախյան խնդրի լուծումը հիմնականում ռազմի դաշտում է.հույս դնելը, թե ուրիշն է կռվելու քո փոխարեն, ուղղակի կործանարար է. Շավարշ Քոչարյան

Ոչ մի իրավական կազմակերպություն, բացառությամբ ՄԱԿ-ի, Ղարաբաղում իրավիճակին խառնվելու ուղիղ լիազորություն չունի: Այդ լիազորություններն ու իրավունքներն ունի միայն ՄԱԿ-ը: Այս մասին այսօր ասաց ՀՀ փոխարտգործնախարար Շավարշ Քոչարյանը` պատասխանելով Լեռնային Ղարաբաղում իրավիճակի կարգավորման համար արտաքին հնարավոր միջամտության մասին հարցին:

«Այս ընթացքում կանոնավոր աշխատանք է տարվել եվրասիական ուղղությամբ։ Մենք հետևողական և կանոնավոր աշխատանքներ ենք տարել նաև մեր հարևաններ Վրաստանի և Իրանի հետ։ Իհարկե, տվյալ պարագայում այս իրավիճակը չի կարող չանհանգստացնել մեր հարևաններին։ Իրանին չի կարող չանհանգստացնել այն հանգամանքը, որ ահաբեկիչները հայտնվել են իր սահմանի մոտ։ Իրանն այդ մասին խոսում է, նաև բավականին նախապատրաստական աշխատանքներ է տանում։

Բնական է՝ ահաբեկիչների հետ կապված վտանգ զգում է նաև ՌԴ-ն, քանի որ այդ վտանգը մոտենում է Հյուսիսային Կովկասին և, ընդհանուր առմամբ, ամբողջ ԱՊՀ տարածքին։ Այդ վտանգից զերծ չի մնում նաև Կենտրոնական Ասիան։ Այնպես որ ձևավորվել է այնպիսի իրավիճակ, որը, այսպես ասած, մտահոգում է բազմաթիվ պետությունների, որոնց հետ մենք ունենք այս կամ այն աստիճան խորացված հարաբերություններ»,- նշել է Շավարշ Քոչարյանը։

Ընդ որում, ըստ փոխնախարարի, միջամտության համար անհրաժեշտ է Անվտանգության խորհրդի համապատասխան որոշումը, եւ դա ստանալը հեշտ գործընթաց չէ:
Նա նաեւ հիշեցրեց, որ ՄԱԿ-ի Անվտանգության խորհրդի երեք մշտական ​​անդամների ղեկավարները` Պուտինը, Թրամփը եւ Մակրոը, կոչ արեցին դադարեցնել ռազմական գործողություններն Արցախում, բայց դա ոչ մի դրական արդյունքի չհանգեցրեց: «Եվ այստեղից մենք պետք է եզրակացություններ անենք»,- ասաց Քոչարյանը:

Անդրադառալով արցախյան խնդրի լուծմանը, ասել է, որ այսօր արցախյան խնդրի լուծումը հիմնականում ռազմի դաշտում է։

«Սա ճշմարտություն է, որը բոլորիս համար պետք է ակնհայտ լինի։ Կախված մեր հաջողություններից, որոնք, կարծում եմ, բոլորս էլ զգում ենք, որ մոտակա ժամանակներում լինելու են, էապես փոխվելու է ամեն ինչ»,- ասել է նա հավելելով, որ ԼՂ խնդիրը վերաբերում է և՛ Հայաստանի դաշնակից, և՛ հարևան երկրներին, ու ակնհայտ է, որ հույս դնելը, թե ուրիշն է կռվելու քո փոխարեն, ուղղակի կործանարար է։