«Երևի 1 կամ 2 օրից դարձյալ կգնամ». Լոռու մարզպետը սահման մեկնելուց 3֊4 անց վերադարձել է

Լոռու մարզպետ Անդրեյ Ղուկասյանն առաջին էր, ով արձագանքեց ՀՀ վարչապետ Նիկոլ Փաշինյանի, Տեղական ինքնակառավարման մարմիններին ուղղված զորահավաքի կոչին։ 

Փաշինյանի կոչի հենց հաջորդ օրը` հոկտեմբերի 22֊ին, Անդրեյ Ղուկասյանը հայտարարեց, որ կամավորագրվել է, ջոկատ է հավաքում ու պատրաստվում է մեկնել առաջնագիծ։ Հայտարարելը` հայտարարեց, բայց առաջնագիծ մեկնեց նոյեմբերի 5-6֊ին։

Իհարկե, չենք քննարկում այն, որ ոչ միայն նա, այլև մյուս մարզպետերն ու համայնքապետերը կարող էին չսպասել վարչապետի կոչին և ավելի անկեղծ երևալ, եթե պատերազմի հենց առաջին օրերին, առանց հատուկ մարզպետերին ուղղված կոչի, կամավորների ջոկատ հավաքեին ու մեկնեին առաջնագիծ...

Ինչևէ...

NEWSPRESS.am-ի աղբյուրների փոխանցմամբ, Անդրեյ Ղուկասյանը Արցախ չի հասել, այլ եղել է միայն Գորիսում։ Նույն աղբյուրի համաձայն էլ, արդեն երեկ` նոյեմբերի 8֊ին, նա  վերադարձել է։

Այսինքն այնտեղ է եղել ընդամենը 3-4 օր։

Փորձեցինք հետաքրքրվել մարզպետից, թե ո՞րն է այդչափ շտապ վերադառնալու պատճառը։ Գուցե խնդիրնե՞ր են առաջացել, հարցրեցինք. «Չէ բայց ինչի՞ խնդիրներ, ինչի՞ եք միայն վատը մտածում»,-ասաց Անդրեյ Ղուկասյանը և հավելեց, որ ամեն ինչ կարգին է։ Նա նաև նշեց, որ կամավորներից ոչ ոք իր հետ չի վերադարձել, ինքը միայնակ է եկել և նորից հետ է գնալու։

Հարցին, թե նոր կամավորների խումբ է տանելու իր հետ, թե ոչ, նա արձագանքեց, որ մենակ եկել է ու մենակ էլ հետ է վերադատնալու։

«Մի քանի բան կա, որ պետք է տանեմ իմ հետ, երևի մեկ կամ երկու օրից դարձյալ կգնամ»,֊աաաց Ղուկասյանը։