Դուք 1000 %-ով մսխել եք ժողովրդի վստահությունը. լավ, ձեր մեջ տղամարդ չկա, որ ասի՝ «մենք պարտվել ենք, պետք է հեռանանք». Մելքումյան

«Կարճ ժամանակ հետո մենք պետք է իմանանք ամբողջ ճշմարտությունը: Երկուսուկես տարվա ընթացքում բոլոր ոլորտներում ձախողակ քայլեր են արվել: ԱԺ արտահերթ նիստի ժամանակ ասաց ԲՀԿ-ական պատգամավոր Միքայել Մելքումյանը: Նրա խոսքով Ժողովրդով իշխանության եկած ղեկավարին ժողովուրդն էլ պետք է ճանապարհ դնի, քանի որ Նիկոլ Փաշինյանը ակնհայտ է, որ դավադիր քաղաքականություն վարելով՝ երկիրը հասցրել է այս վիճակին: 

Անդրադառնալով Արտաքին գործերի նախարարի հրաժարականին՝ Միքայել Մելքումյանն ասաց.

«Հրաժարականն ԱԳ նախարարի համար ամենահեշտ քայլն էր, բայց եղբայր, ո՞ւր ես գնում: Զոհրաբ Մնացականյանը և մյուս նախարարները պետք է գան և այս ամբիոնից ասեն՝ ինչ են ուզել անել, բայց չեն թողել, որ անեն:

Պաշտպանության նախարարն էլ պետք է գա, ասի՝ ինչ էր ուզում անել, բայց իրեն չեն թողել: Այսօր Հայաստանը կանգնած է լրջագույն աղետի առջև: Հիմա մենք իրականացնում ենք այն ծրագրերը, որ ուզում էր իրականացնել դեռ Հեյդար Ալիևը», - ասաց պատգամավորը:

Միքայել Մելքումյանը շեշտեց՝ իմքայլական պատգամավորները կիսում են վարչապետի վարած քաղաքականության պատասխանատվությունը:

«Դուք հազար տոկոսով մսխել եք ժողովրդի վստահությունը: Լավ, ձեր մեջ տղամարդ չկա՞, որ վեր կենա, գա, այստեղից ասի՝ «մենք պարտվել ենք և պետք է հեռանանք»», - հարց ուղղեց պատգամավորը: