Իր հետ եղած զինվորներից մեկը Բաքվի բերդից զանգել է ծնողներին ու ասել՝ լավ են. ժամկետային զինծառայող Հայկ Արևշատյանի ծնողները համոզված են, որ իրենց որդին ևս գերի է ընկել

Ժամկետային զինծառայող Հայկ Մուրադի Արևշատյանը 2 ամսվա զինծառայող էր, երբ մեկնարկեց պատերազմը: Նա ծառայում էր Մարտունիում: Վերջին անգամ Հայկը ծնողներին զանգահարել է Հադրութ-Ֆիզուլի-Ջաբրայիլ հատվածից հոկտեմբերի16-ին: Ծնողները համոզված են, որ նա գերի է ընկել:

NEWSPRESS.am-ի հետ զրույցում զինծառայողի հայրը՝ Մուրադ Արևշատյանն ասաց, որ համոզված է, թե որդին գերի է. նման համոզմունքի պատճառն այն է, որ Հայկի հետ եղել է ևս 4 զինծառայող, և նրանցից մեկը Բաքվի բերդից զանգահարել է իր ծնողներին ու հայտնել, որ լավ են: Զանգը կատարվել է Կարմիր խաչի միջազգային կոմիտեի միջոցով:

«Իր ընկերը, որ զանգել է, մենք արդեն հասկացել ենք, որ իրենք էլ են գերի: Մենք, իմանալով, որ իրենք 5-ով են եղել, համոզված ենք, որ երեխան գերի է: Այդ պատճառով դիմել ենք ՄԻԵԴ, ու հայտը բավարարվել է»,- ասաց Արևշատյանը: 

Նա նշեց, որ խոսել են ԿԽՄԿ-ի, ՊՆ-ի հետ՝ ապարդյուն. «Ոչ մեկին չեն հիշում, հենց նոր եմ գալիս Կարմիր խաչից, ասում են՝ մենք չենք տեսել երեխուն էնտեղ, ինֆորմացիա չենք կարող տալ»:

Մեր հարցին, թե վարչապետի հետ հանդիպման գնացե՞լ է, մեր զրուցակիցը բացասական պատասխան տվեց, թե՝ ի՞նչ գնամ հանդիպման, գնում ես նկարվում, հետ գալիս, գնացողներն էլ են փոշմանել:

Մուրադ Արևշատյանը հայտնեց, որ որդուն որևէ լուսանկարում կամ տեսանյութում չի տեսել, փնտրել է զոհվածների մեջ, ԴՆԹ անալիզ էլ է հանձնել, բայց որևէ տեղ չի գտել: 

Հիշեցնենք, որ պատերազմի ընթացքում գերության մեջ հայտնված զինվորական ծառայողների և ձերբակալված քաղաքացիական անձանց իրավունքների պաշտպանության գործով Եվրոպական դատարանը 23.11.2020թ․-ին և 27.11.2020թ․-ին բավարարել է Արտակ Զեյնալյանի և Սիրանույշ Սահակյանի դիմումները՝ կիրառելով հրատապ միջոց։ Եվրոպական դատարանը Ադրբեջանի կառավարությունից պահանջել է փաստաթղթավորված տեղեկություն նրանց գերեվարման փաստի, գտնվելու վայրի, պահման պայմանների և բժշկական սպասարկման վերաբերյալ: Դատարանը պահանջվող տեղեկությունը տրամադրելու համար, համապատասխանաբար, ժամկետ է սահմանել մինչև 30.11.2020թ և 04.12.2020թ: Գերեվարված զինծառայողների ցուցակում է  նաև Հայկ Արևշատյանի անունը: 

Աստղիկ Հովհաննիսյան