Թորոսյանը լուծարման է դատապարտել Հայաստանում գործող միակ նևրոզների կլինիկան․ զոհվածների հարազատները դիմել են կառավարությանը

Կոտայքի մարզի, Քասախ համայնքում գործող հանրապետության միակ նևրոզների կլինիկա փակ բաժնետիրական ընկերությունը կանգնած է լուծարման եզրին։ Դեկտեմբերի 11-ին կլինիկայի տնօրինությանն է ներկայացվել ՀՀ Առողջապահության որոշումը, որով 2021 թվականից բուժհիմնարկում դադարեցվելու է պետպատվերով սպասարկումը։

NEWSPRESS.am-ի հետ զրույցում կլինիկայի տնօրեն Ցոլակ Հակոբյանը վստահեցնում է, որ առանց պետտավերի՝ կլինիկան չի կարող երկար գոյատևել։ Նա բացատրում է, որ հատկապես այս օրերին կենտրոնն աշխատում է գերծանրաբեռնված ռեժիմով։ Մասնավորապես առկա 50 մահճակալը սպասարկում են 55 հիվանդի։

Ցոլակ Հակոբյանը նկատում է, որ միշտ էլ իրենց մոտ հիվանդները շատ են լինում՝ 100% ծանրաբեռնվածությամբ, իսկ հատկապես այս պատերազմական շրջանում, նրանց թիվը ավելացել է և միտում կա ավելանալու՝ կապված զոհերի, վիրավորների ու անհետ կորածների թվի աճի հետ, քանի որ կլինիկայում հիմնականում բուժում են ստանում զինվորներ, հաշմադամներ ու զոհվածների ծնողներ և բոլոր նրանք, ովքեր հարազատի են կորցրել։ Այս մարդկանց հետ հարկավոր է վերականգնողական աշխատանքներ տանել, մինչդեռ, առանց որևէ հիմնավոր փաստարկի ու բացատրության, Առողջապահության նախարությունից ասել են, որ եկող տարի պետպատվեր չի գործելու։

«Առողջապահության նախարարությունը գրել է մեզ, որ նպատակահարմար չի գտնում 2021 թվականին պետպատվեր ներդնել այս կլինիկայում։ Եթե պետպատվեր չլինի՝ կլինիկան կամ պետք է լուծարվի, կամ բուժաշխատողները ազատման դիմում գրեն, և քիչ աշխատողներով սկսեք աշխատել վճարովի հիմունքներով»,-ասում է տնօրենը։

Նա անիրատեսական է համարում վճարովի հիմունքներով աշխատանքը, քանի որ հիմնականում գործ ունեն սոցիալապես անապահով խավի հետ։

«Մենք ինչպե՞ս կարող ենք, օրինակ՝ զինվորից, կամ զինվոր կորցրած ծնողից գումար վերցնել»,-ասում է կլինիկայի տնօերնը։

Նա նշում է, որ աշխարհում կան նևրոզների բաժանմունքներ, որոնք գործում են հոգեբուժարանների կազմի մեջ, իսկ սա միակ այդպիսի կլինիկան է, որը գործում է որպես առանձին հիվանդանոց։

«Եթե այդ բուժհաստատությունը չգործի՝ հիվանդներին կուղարկեն հոգեբուժարան։ Ես ինչպե՞ս կարող եմ մեր զինվորներին հոգեբուժարան ուղարկել, նրանք խելագար չեն»,-ասում է Ցոլակ Հակոբյանն ու նկատում, որ պետպատվերի շրջանակում հիվանդները 3 անգամ անվճար սնվում են, սպասարկում են դեղորայքով ու մասնագիտացված բուժում իրականացնում։

Կլինիկան ունի 45 աշխատող, ովքեր նվիրվածությամբ աշխատում են։ Նրանց թվում է նաև մեկ ամիս առաջ Արցախի հարավային հատվածում մարտերի ժամանակ նահատակված գնդապետ Վահագն Ասատրյանի մայրը։ Նա աշխատում է որպես գլխավոր բուժքույր և վիշտը սրտում, բայց մասնագիտորեն ու անվերապահորեն իր գործին նվիրված՝ օգնում է վերականգնվել այլ որդեկորույս մայրերին ու վիրավոր զինվորներին։

«Եվ այս կնոջը զրկում են աշխատելու իրավունքից, պատկերացնո՞ւմ եք․․․»,-ասում է Ցոլակ Հակոբյանը։

Նկատենք, որ կլինիկայի հաճախորդները նամակ են ուղղել Կառավարությանը՝ վարչապետին ու Առողջապահության նախարարին, ներկայացնելով պետպատվերը հանելու հետ կապված իրենց մտահոգությունը և հնարավոր խնդիրները։

Արմինե Մկրտումյան