Հայկ Մարությանը հրաժարվել է վճարել 13-րդ աշխատավարձերը․ ինչո՞ւ են քաղաքապետարանի աշխատակիցները բունտ անում

Երեւանի քաղաքապետերանի աշխատակիցները դժգոհ են քաղաքապետի որոշումից, ըստ որի իրենք այս տարի չեն ստանա աշխատավարձային ֆոնդով իրենց տրամադրվող ամենամյա 13-րդ աշխատավարձը։ Երեւանու Ավագանու «Լույս» խմբակցության ղեկավար Դավիթ Խաժակյանը NEWS.am-ին հայտնեց, որ աշխատակիցներն այսօր հավաքվել էին եւ քննարկում էին անցկացնում, իսկ վաղը կներկայացնեն իրենց պահանջները։

«Նրանց վրդովմունքը 13-րդ աշխատավարձով է պայմանավորված, որը սահմանված է աշխատավարձային ֆոնդով, ոչ թե պարգեւավճարային։ Աշխատակիցները, որոնք միջինից էլ ցածր աշխատավարձ են ստանում, վրդովված են, քանի որ Հայկ Մարությանն այս երկու տարիներին իր մերձավորներին տալիս էր անգամները գերազանցող պարգեւավճարներ, իսկ այս տարի մշտապես տրվող 13-րդ աշատավարձն իրենց հրաժարվում է տալ։ Փաստորեն, Մարությանը, վախենալով հանրային արձագանքից, այդպիսի քայլի է գնացել, իսկ դա խոսում է ղեկավարի թույլ կամային հատկանիշների մասին»,- նշեց նա։

Դավիթ Խաժակյանի խոսքով՝ վաղը՝ ժամը 10-ին, աշխատակիցները կհավաքվեն, կներկայացնեն իրենց պահանջները։

Հիշեցնենք, որ Mediaport տելեգրամյան ալիքն այսօր ավելի վաղ հայտնել էր, որ քաղաքապետարանում բունտ է, աշխատակիցները պահանջում են քաղաքապետ Հայկ Մարությանի հրաժարականը։