Հայրենիքի պաշտպանությունը՝ հետապնդման օբյեկտ. Կարոլինա Հարությունյան

Այսօր ՀՀ ոստիկանության Սյունիքի մարզային վարչության Գորիսի բաժնում հարուցվել է քրեական գործ՝ ՀՀ քրեական օրենսգրքի 34-րդ և 2251 հոդվածի 1-ին մասի հատկանիշներով, ինչի արդյունքում ձերբակալվել է Գորիս համայնքի ղեկավար Առուշ Առուշանյանը:

ՀՀ քրեական օրենսգրքի 2251 հոդվածը սահմանում է քրեական պատասխանատվություն՝ օրենքով սահմանված կարգի խախտմամբ հավաքը դիտավորությամբ կազմակերպելու և անցկացնելու համար: Սակայն այս հոդվածը պարունակում է բլանկետային նորմ, որը հղում է կատարում այլ նորմատիվ իրավական ակտերի: Այսպիսով, հավաքների կազմակերպման և անցկացման կարգը սահմանվում է «Հավաքների ազատության մասին» օրենքով:

ՀՀ քրեական օրենսգրքի 34-րդ հոդվածը սահմանում է՝ ինչ է հանցափորձը: Հանցափորձ է համարվում ուղղակի դիտավորությամբ կատարված այն գործողությունը (անգործությունը), որն անմիջականորեն ուղղված է հանցանք կատարելուն, եթե հանցագործությունն ավարտին չի հասցվել անձի կամքից անկախ հանգամանքներով:
Այսինքն՝ Գորիս համայնքի ղեկավար Առուշ Առուշանյանն այսօր ձերբակալվել է օրենքով սահմանված կարգի խախտմամբ հավաքը դիտավորությամբ կազմակերպելու և անցկացնելու հանցափորձի կասկածանքով:

Սակայն ՀՀ քննչական կոմիտեի հայտարարության մեջ բացակայում է այն հարցի պատասխանը, թե «Հավաքների ազատության մասին» օրենքի ո՞ր ընթացակարգի խախտման հետևանքով է առաջացել ՀՀ քրեական օրենսգրքի 2251 հոդվածի հանցափորձի կասկածանքը:

Շատ կարևոր է այն հանգամանքը, որ ՀՀ քրեական օրենսգրքի 2251 հոդվածը խնդրահարույց և սխալ է համարում այն հիմնավորմամբ, որ համաչափ և օրինաչափ չէ օրենքով սահմանված կարգի ցանկացած խախտման համար նախատեսել քրեական պատասխանատվություն, հատկապես՝ իրազեկման կարգի խախտման դեպքերում: Քրեական պատասխանատվությունը պետք է նախատեսվի բացառապես հանրորեն վտանգավոր արարքների համար և չպետք է կրի ձևական բնույթ:

Ինչպես տեսնում ենք, այսօր Առուշ Առուշանյանի ձերբակալումը քաղաքական հետապնդման արդյունք է, որի նպատակն էր խափանել սյունեցիների՝ սեփական հողի համար պայքարի կուռ ոգին: Այս պայքարը ո՛չ քաղաքական էր, ո՛չ կուսակցական: Հավաքի միակ նպատակը Հայրենիքի խոցված արժանապատվության, անվտանգության և հայ ազգի ֆիզիկական գոյության պաշտպանությունն էր: Սյունեցիները մեկ անգամ ևս ապացուցեցին, որ իրենց ոգին անկոտրում է, և ոչ մի շինծու քրեական-քաղաքական հետապնդում չի կարող խոչընդոտել Հայրենիքի պաշտպանության գործին:

Կարոլինա Հարությունյան