Ես կոչ եմ անում հեռուստացույցի, համակարգիչների, հեռախոսների դեմ նստածներին՝ քարը փեշներիցդ թափեք, ում եք սիրում, ում չեք սիրում՝ կարևոր չի, եկեք. Վազգեն Մանուկյան

Ես այս պետության հիմնադիրներից մեկն եմ եղել և ես ինձ վրա պատասխանատվություն էի զգում, որ այսպիսի խայտառակ պարտություն կրեցինք ու պարտությունից հետո նույն գիշերը չշպրտեցինք դուրս: Այդ մասին Հանրապետության հրապարակում ընթացող հանրահավաքի ժամանակ հայտարարեց «Հայրենիքի փրկության շարժման» թեկնածու Վազգեն Մանուկյանը:

«Բայց այսօր ես նայում եմ ձեր աչքերի և հպարտ եմ: Ես նորից տեսնում եմ այն ժողովրդին, որը տարիներ առաջ և այդ տարիների ընթացում հպարտ նայում էր դեպի ապագան: Ունեինք դժգոհություներ, ունեինք թերություններ, կային գող-ավազակներ, կային հրեշտակներ, կային հերոսներ, բայց մենք մի հասարակություն էինք, մենք մեր մեջ մեր հարցերը կլուծեինք, բայց այն, ինչ մեզ հետ կատարվեց, սարսափելի է, որ մենք թույլ տվեցինք այդ բանը:

Նա նշեց, որ ոչ միայն կվերականգնեն անցյալը, այլև այդ անցյալը կուղղեն:

«Մենք կկառուցենք այն պետությունը, որի մասին երազում էինք, ոչ թե այն պետությունը, որը ստացանք, և բոլորս միասին: Մի մտածեք, որ որևէ կառավարություն կառուցելու է Հայաստանը, Հայաստանը կառուցում է իմ ժողովուրդը, այն ժողովուրդը, որը այստեղ կանգնած է: Եվ ես կոչ եմ ուզում անել հեռուստացույցի, համակարգիչների, հեռախոսների դեմ նստածներին՝ քարը փեշներիցդ թափեք, ում եք սիրում, ում չեք սիրում՝ կարևոր չի, հիմա մեր երեխաների, մեր թոռների ապագայի հարցն է լուծվում: Եկեք: Հետո մենք իրար մեջ կպարզենք՝ ով է ճիշտ, ով է սխալ, բայց հիմա մենք բոլորս միասին ենք: Ոնց որ պատերազմ որ լինում է, բոլոր շերտերը իրար հետ միանում են, որպեսզի գնան պատերազմ, գնան փրկեն Հայաստանը: Հիմա նորից պատերազմ է, պատերազմ է մեր ապագայի համար»,- ասաց Մանուկյանը: