Էդ ո՞նց եղավ, որ հիմա հիշեցին. սյունեցիների հետ ճանապարհ փակելուց հետո Քաջարանի քաղաքապետը հրավիրել է ՔԿ՝ ամիսներ առաջ տեղի ունեցած վիճաբանության գործով

Քաջարանի քաղաքապետ Մանվել Փարամազյանը բերման չի ենթարկվել, այլ հրավիրվել է Քննչական կոմիտե՝ Հատկապես կարևոր գործերի քննության գլխավոր վարչություն, մի քանի ամիս առաջ հարուցված մի քրեական գործով: Այդ մասին NEWSPRESS.am-ի հետ զրույցում ասաց Քաջարանի քաղաքապետ Մանվել Փարամազյանը:

«Նախկինում հարուցված քրեական գործ է: Մոտ 5-6 առաջ քրեական գործ կար հարուցված՝ վիճաբանության հետ կապված: Մի փոքր վիճաբանություն էր եղել մեր քաղաքի երիտասարդների մեջ: Մեղադրյալի կարգավիճակ ունեմ, բայց դա ինձ համար էլ էր անակնկալ»,- ասաց քաղաքապետը:

Մեր հարցին, թե այսինքն՝ նրա հարցաքննության հրավիրվելը երեկ Սյունիքում ճանապարհներ փակելու հետ կապ չունի՞, Փարամազյանը պատասխանեց.

«Ես արդեն գիտեմ՝ խնդիրը որն է, դուք խնդիրը չգիտե՞ք. ովքեր հայրենասեր մարդիկ են ու պայքարում են այս հայրենիքի համար, այս ազնիվ, հայրենասեր մարդիկ էս երկրում տեղ չունեն, պիտի դավաճանները, չէ՞, այս երկրում տեղ ունենան, թե չէ մեզ նման մարդիկ իրան ձեռք չեն տալիս, որ ունենան: Մենք մոռացել էինք այդ քրեական գործի մասին, որովհետև իրենից ոչինչ չէր ներկայացնում: Էդ ո՞նց եղավ, որ հիմա հիշեցին»:

Նա նշեց, որ Փաշինյանի՝ Սյունիք կատարած այցի ընթացքում ինքը եղել է ճանապարհը փակած ժողովրդի կողքին. «Գորիս-Տաթև ճանապարհին էի: Ակցիային մենք էլ էինք մասնակցում: Դավաճանի մուտքն արգելվում է Սյունիքի մարզ»:

Քաղաքապետի խոսքով՝ իրենց պայքարը շարունակվելու է մինչև, նրա խոսքով, «սրանք հրաժարական տան»:

«Մեր ակցիային որևէ մեկը թող քաղաքական ենթատեքստ չկա: Մենք որևէ քաղաքական ուժի չենք սատարում, մեր խնդիրը լրիվ այլ է: Մեր խնդիրը հետևյալն է՝ Սյունիքն ուժեղ պահենք, ամուր պահենք, էս եղածը գոնե մնա մեր ժողովրդին, քանի որ էս ամենը մեր պապերն են մեզ ժառանգություն թողել, մենք՝ էլ որպես ժառանգորդներ, այս եղածը պատվով պահենք, սա էլ չտանեն ձեռքներիցս, թե չէ՝ այսպես որ թողնենք, մի գեղեցիկ օր սա էլ են տալու, ոնց որ թուրքերին բերեցին, լցրին այստեղ: Դրա համար մենք բոլորս՝ գիտակից մարդիկ, պիտի պայքարենք: Այն ժամանակ խոսում էին Արցախի մասին, Արցախը պրծավ: Հիմա էլ հերթը Սյունիքինն է: Բայց այստեղ բոլորն էլ հերոս մարդիկ են ու մինչև վերջ տեր են կանգնելու հողին»: