«Այ քեզ բա՜ն, ո՞վ ա ասում, որ Երասխի դիրքը հանձնվելու ա»․ Երասխի համայնքապետը՝ տղերքի դիրքից իջնելու հրահանգի մասին

Արարատի մարզի հայ-ադրբեջանական շփման գծից մի քանի մետր հեռու գտնվող Երասխ գյուղի բնակիչները մտահոգված են։ NEWSPRESS.am-ի հետ զրուցում տեղի բնակիչներն ասացին, որ տղաներին հրաման է տրվել ուրբաթ օրը իջնել դիրքերից։ Գյուղում լուրեր են շրջանառվում այն մասին, որ ուրբաթ օրը դիրքը հանձնելու են ադրբեջանցիներին։

Տեղեկատվությունը ճշտելու համար, NEWSPRESS.am-ը կապ հաստատեց Երասխ համայնքի ղեկավար`  Ռադիկ Օղիկյանի հետ։

«Այ քեզ բա՜ն, ո՞վ ա ասում․․․ նոր-նոր լսում եմ նման բան»,-լսելով հարցը՝ պատասխանեց Ռադիկ Օղիկյանը՝ ծիծաղելով ու կողքի մարդկանց ներկայացնելով, թե ինչու են զանգում։ 

«Ծիծաղով ենք ընդունում լուրը»,-ասաց նա։

Համայքնի ղեկավարը նկատեց, որ իրենց դիրքը լքելու հրահանգ չի տրվել։

«Ես չգիտեմ, թե ում են ասել, բայց մեզ հաստատ ոչ ոք նման բան չի ասել ու չի էլ կարող ասել»,-ասաց համայքնի ղեկավարը։

Երբ պատրաստվում էինք հրապարակել նրա հերքման տեքստը՝ գյուղապետը հետ զանգահարեց և խնդրից նորից ներկայանալ, թե ում հետ է խոսել ինքը (թեև բարևից անմիջապես հետո, արդեն ներկայացրել էի լրատվական կայքն ու անուն ազգանունս)։

Ես նորից ներկայացա, որից հետո նա նորից հարցրեց, թե ո՞վ է նման բան ասել և խնդրեց կոնկրետ անուններ տալ, թե ով է այդ մասին ասել կամ գրել։

«Կոնկրետ անուն կարա՞ք տաք մի հատ, գտնենք, ճարենք տեսնենք, թե ինչ են ասել, գրել, ո՞վ է փորձել տարածել նման ապուշ բան»,-ասաց գյուղապետը։

Նա խնդրեց այն մարդկանց անուններն ու հեռախոսահամարները, ովքեր նման տեղեկություն են հայտնել, ինչին արձագանելով՝ նկատեցինք, որ մենք չենք բացահայտում մեր աղբյուրը։

-Պարոն Օղիկյան, Ձեր համար ի՞նչ տարբերություն՝ ով է ասել։ Հիմա կհրապարակենք, որ նման լուրեր են շրջանառվում, բայց Դուք հերքում եք։

-Չէ՛, համարը տվեք ինձ, ո՞վ է ասել։

-Ձեր ինչի՞ն է պետք, թե կոնկրետ ով է ասել։

-Որ իմանամ՝ զուտ հետաքրքրության համար, ուրիշ բան չմտածեք։

-Ի՞նչ պետք է մտածենք։

 -Դե որ ասում եք՝ Երասխից ա ասողը, կամ բան․․․ Երասխի տղերքը էսօր սաղ ինձ հետ կանգնած են ստեղ՝ սահմանին։ Զարմանալի ա ուղղակի, թե էդ ապուշությունը ով ա ասում։ Զուտ դրանից եմ վրդովվում։ Հիմա կոնկրետ հղում չե՞ք տալու, թե ումից եք նման բան լսել․․․

-Ո՛չ, կարևորը՝ հերքում եք տեղեկատվությունը։

-Լա՛վ, Աստված Ձեր հետ,-ասաց համայնքապետը, ապա, հավանաբար կողքին գտնվողների հարցին պատասխանելով, ասաց,-արա, մուտիլովկայա․․․

Չենք կարող ասել, թե կոնկրետ ինչը համյանքապետը համարեց «մուտիլավկա», բայց նկատենք, որ մեր աղբյուրի հետ զրույցում տեղեկացել ենք, որ թշնամուն է հանձնվելու Երասխ-Սադարակ հատվածում բլրի վրա գտնվող դիրքերից։ Տեղի բնակչությունն անհագստանում է, քանի որ այդ տարածքում նախկինում Ադրբեջանին է պատկանել 3 գյուղ, որոնք ավելի ուշ անցել են Հայաստանի վերահսկողության տակ։

Իսկ քանի որ վարչապետ Նիկոլ Փաշինյանը հայտարարում է, թե այս կամ այն տարածքը ադրբեջանցիներնն է և պետք է վերադարձնել, ուստի տեղի բնակիչներն մտահոգված են, որ այս հատվածը ևս պատրաստվում են հանձնել Ադրբեջանի վերահսկողությանը, հատկապես, որ լսել են նաև, որ տղաներին ուրբաթ օրը իջեցնում են դիրքից։

Արինե Մկրտումյան