Իշխանության և ՀՀԿ-ի տարբերությունն այն է, որ այս իշխանությունը սերմանել է ատելություն․ Դավիթ Հարությունյան. VIDEO

Յուրաքանչյուրը պետք է իրեն հարց տա՝ ինչո՞վ է պայմանավորված, որ հենց մեր սահմանի վրա Ադրբեջանը սկսել է կառուցել խոշոր ռազմաբազաներ եւ տեղակայել հարձակողական զենքեր։ Այս մասին այսօր՝ դեկտեմբերի 24-ին Կառավարության դիմաց լրագրողների հետ զրույցում ասաց Արդարադատության նախկին նախարար Դավիթ Հարությունյանը։

«Այո, ես հասկանում եմ, որ շատերի հույսն այն է, որ այսօր Ռուսաստանը թույլ չի տա Հայաստանի տարածք ներխուժել, չնայած դա փաստացի տեղի է ունենում, բայց Ադրբեջանն այսօր պատրաստվում է այն պատերազմին, որին մասնակցելու են մեր երեխաներն ու թոռները։ Եվ դա չնկատել անթույլատրելի է։ Դուք կարող եք չսիրել Սերժ Սարգսյանին կամ Ռոբերտ Քոչարյանին, բայց դուք չեք կարող չսիրել ձեր երեխաներին ու թոռներին»,- ասաց Հարությունյանը։

Հարցին, թե իր կարծիքով ի՞նչ սխալ է թույլ տվել ՀՀԿ-ն, որ այսօր, այս իրավիճակում, երբ փաստաթուղթ է ստորագրվել և տարածքներ են հանձնվում թշնամուն, շատ քաղաքացիներ ասում են՝ լավ է Նիկոլ Փաշինյանը մնա, քան Հանրապետականը հետ գա իշխանության, Դավիթ Հարությունն արձագանքեց․ «Չկա իշխանություն, որ սխալներ թույլ չի տվել, ՀՀԿ-ն եւս բացառություն չէ։ Եթե լինեին իշխանություններ, որոնք սխալներ թույլ չտային, նրանք երբեւէ չէին փոխվի։ ՀՀԿ-ն սխալներ ունեցել է, բայց ո՞րն է տարբերությունը ՀՀԿ-ի եւ այս իշխանության։ Կարծում եմ ոչ թե այն՝ որ այս իշխանությունն ավելի ժողովրդավար է, ոչ, դա այդպես չէ, ոչ թե այն՝ որ այս իշխանությունն ավելի հակված է իրավական պետություն ունենալուն, այլ այն, որ այս իշխանությունը սերմանել է ատելություն, պատմությունից հայտնի է՝ պետք է բաժանել, որպեսզի տիրես։ Եթե ներքին թշնամի չկա, պետք է ստեղծել։ Այդ հոգեբանական հնարքը ցավոք, աշխատել է տարիների ընթացքում տարբեր երկրներում եւ կործանել է տարբեր երկրներ։ Այդ ամենն այս պահին տեղի է ունենում մեր երկրում»,-ասաց նա։

Դիտարկամնը, թե ինչպես Նիկոլ Փաշինյանի իշխանությունը հասարակությանը սեւ ու սպիտակների բաժանեց, այնպես էլ հիմա են հասարակությանը էլիտա ու ժեխ անվանում, Դավիթ Հարությունյանն ասաց, որ, իր կարծիքով, դա արհեստական բաժանում է։

«Չի կարելի ժողովրդին բաժանել, եւ դա շատ լավ հասկանում է հարթակը, նրանք, ովքեր ասում են՝ մեր երկիրը կործանվում է։ Դա է պատճառը, համենայնդեպս իմ շրջապատում ես չեմ լսել, որ որեւէ մեկը, հասարակությանը բաժանի էլիտայի եւ ժեխի, բայց դա անում է հենց իշխանությունը»,- նշեց Դավիթ Հարությունյանը։