Ցանկացած ԶԼՄ կարող է պարզել՝ որտեղ է եղել «Հայրենիք» զորախումբը և ում հրամանով ու երբ է դուրս եկել Արցախից․ Վահե Դոխոյանն արձագանքել է սուտ տեղեկություններին

«Հայրենիք» կուսակցության ղեկավար Արթուր Վանեցյանի ղեկավարած զորախումբը «Ուազ» մակնիշի մեքենա առհասարակ չի ունեցել․ զորախմբի զենք տեղափոխող մեքենան եղել է «Ֆորդ» մակնիշի բեռնատար։ Այս մասին հայտարարում է «Հայրենիք» կուսակցության Լոռու մարզային կառույցի ղեկավար Վահե Դոխոյանը՝ արձագանքելով «Հայրենիք» զորախմբի շուրջ պտտվող տարաբնույթ ասեկոսեներին ։

«Ցանկացած իրական լրատվամիջոց կարող է ՊՆ կամ ՊԲ հարցում ուղարկել, թե որտեղ է եղել «Հայրենիք» զորախումբը, ինչ գործողությունների է մասնակցել և ում հրամանով ու երբ է դուրս եկել Արցախից։

Իսկ մի քանիսը, որ ունեն «հայտնի» անցյալ, կասկածելի ներկա ու անհեռանկար ապագա, ոգևորված տարածում են էս նյութը։

Բա ձեզ չի հետաքրքրո՞ւմ՝ ինչի հանձնեցին հողերը, ինչից է, որ գրեթե ամեն առավոտ զարթնում եք ու իմանում նոր տարածքների հանձնման մասին։

Բա 12000 կմ տարածքը հո «Հայրենիք» զորախո՞ւմբը չի հանձնել, բա «Սցենարային» պատերազմի այդքան զոհերի մեղավորը հո «Հայրենիք» զորախո՞ւմբը չի, բա այդքան գերիները, որ ունենք ու առանց ամաչելու Ամանորին քեֆեր եք անում մեղավորը հո «Հայրենիք» զորախո՞ւմբը չի, Սփյուռքից ուղարկված օգնությունը, որ լափեցին, դրանում մեղավորը հո «Հայրենիք» զորախո՞ւմբը չի։

Որ մեկն ասեմ․․․

Մարդ եղեք, մի կողմ դրեք նեղ անձնական շահերը, սթափ դատեք ու փորձեք գիտակցել ինչ ենք կորցրել ու դեռ ամեն օր կորցնելու ենք` քանի դեռ հայի է՛ս տեսակը մորթապաշտությամբ է զբաղված։

Վախեցեք զոհերի ու գալիք սերուդների անեծքից...»,-գրել է Վահե Դոխոյանը՝ ֆեյսբուքյան իր էջում։

Նա նաև նշել է, որ անբարոյականություն է նման հերյուրանք գրելն ու սուտ լուր տարածելը։