Հալալ է Ձեզ. դուք իսկապես Չորրորդ իշխանություն եք. Մանուկյանը` լրագրողներին

Երեկ Հայաստանի ժողովուրդը ցույց տվեց, որ ոչ մի արգելք, սպառնալիք, կաշառք ու խոչընդոտ, ոչ մի ահաբեկում իր կամքի վրա ազդել չի կարող:

Այդ մասին «Ազատության» հրապարակում «Հայ ազգային կոնգրես» և «Հայաստանի ժողովրդական» կուսակցությունների կողմից հրավիրված հանրահավաքին հայտարարեց «Հայ ազգային կոնգրես» խմբակցության պատգամավոր Արամ Մանուկյանը:

Նրա խոսքով` իշխանությունները ընտրությունները կեղծել են` օգտագործելով հին եւ նոր մեթոդներ:

«Մի քանի տարի Հայաստանի ընտրություններում լցոնում չէր եղել: Ամեն տեղամասում 80-100 մարդ են դրսից բերել կրկնակի քվեարկության»,-ասաց Արամ Մանուկյանը:

Նա շնորհակալություն հայտնեց նաև բոլոր նրանց, ովքեր «ոչ» են քվեարկել` վստահեցնելով, որ իրականում ժողովուրդը հաղթել է, «ոչ»-ը հաղթել է:

Նա շնորհակալություն հայտնեց հատկապես լրագրողներին, ովքեր ոչ միայն անաչառ լուսաբանեցին հանրաքվեն, այլև չնայեցին իրենց դեմ գործադրվող բռնություններին:

«Լրագրողների դեմ բռնության 13 դեպք է արձանագրվել, բայց նրանք կարողացել են այնպիսի ընտրակեղծիքներ տեսագրել, որոնք խոսուն փաստեր են: Հալալ է Ձեզ, որովհետև դուք իսկապես Չորրորդ իշխանություն եք»,-հայտարարեց Արամ Մանուկյանը: