Երբ ասում ենք փախստական, այդ բառն արդեն իսկ խոսում է բոլոր խնդիրների մասին. Շուշիի արդեն նախկին քաղաքապետ. VIDEO
Շուշիից, Հադրութից և Արցախի Հանրապետության տարբեր շրջաններից բռնի տեղահանված մարդիկ այժմ բազմաթիվ խնդիրների առջև են հայտնվել․ կապված և՛ կենցաղի հետ, և՛ սննդի հետ, և՛ հագուստի հետ։ Այսօր` հունվարի 25֊ին, լրագրողների հետ հանդիպման ժամանակ ասաց Շուշիի արդեն նախկին քաղաքապետ Արծվիկ Սարգսյանը։
Նա չի ժխտում, որ կան կազմակերպություններ և բարի մարդիկ, որոնք օգնում են, բայց դա բավարար չէ՝ ապահովված լինելու համար։
«Այսօր ցավալի է, որ, որտեղ բնակվում են՝ լինի Արցախում, թե Հայաստանի Հանրապետությունում, վարձու բնակարանները աստղաբաշխական թվեր են կազմում, և, ճիշտ է, պետական հովանավորության տակ գտնվում են, բայց այդ գումարներով հնարավոր չէ վարձը մարել»,-ասաց Շուշիի քաղաքապետ Արծվիկ Սարգսյանը։
Նա նաև մտահոգիչ համարեց, որ աջակցության՝ 68+15 հազար դրամներից չեն օգտվում տղամարդիկ։
«Մի քանի անգամ ես հարցը բարձրաձայնել եմ, բայց ասում են՝ թող տղամարդիկ գնան, աշխատեն․․․ բայց ո՞րտեղ աշխատեն՝ աշխատանք չկա»,-արձանագրեց Արծվիկ Սարգսյանը։
Մարդիկ նաև բողոքում են, որ գումարները չեն նստում իրենց հաշվեհամարներին։
«300 հազարական դրամ գումար է տրվում, բայց օրենքի մեջ թերի բան կա. Շուշին և այն համայնքները, որ գտնվում են Ադրբեջանի վերահսկողության տակ, բնակիչները պետք է օգտվեն 300 հազարից, այսինքն, օրենքի մեջ գրված է՝ ովքեր 3 և ավելի ամիսներ բնակվել են Շուշիում… էդ ո՞նց պարզենք՝ 3 ամիս բնակվե՞լ են, թե՞ 10 օր պակաս է եղել, խնդիրներ են առաջանում։ Կարող է պատահել՝ մարդիկ 3 ամիսը չեն բնակվել, բայց մի քանի ամիս առաջ իրենց տունն ու տեղն են թողել՝ կահույք է եղել, կահավորած բնակարաններ են եղել, բայց այսօր դրանք ոնց որ լրիվ մոռացվում են, քանի որ 3 ամիս չի բնակվել»,-ասաց Արծվիկ Սարգսյանը։
Նրան հետաքրքրում է՝ հետագայում ո՞նց է լինելու այդ հարցը, որ մարդիկ, եթե հիմա 300 հազարից չեն օգտվում, բա իրենց էն ունեցվածքը, որ կորցնում են, ո՞նց է լինելու, էդ հատուցումը ո՞նց է լինելու․ «Մարդիկ ունեցվածք են թողել, թողել են ամեն ինչ, մարդիկ թողել են իրենց հիշողությունները, իրենց տան սրբություններն են թողել, և կարելի է գոնե ինչ-որ ձև մտածել, որ բոլորը օգտվեն թեկուզ այդ 300 հազար դրամներից»,-ասաց Արծվիկ Սարգսյանը։
Նրա գնահատմամբ, երբ ասում ենք փախստական, այդ բառն արդեն իսկ խոսում է բոլոր խնդիրների մասին։
«Մարդիկ թողել են տուն֊տեղ և այն ամենը, ինչ ունեցել են և իրենց հագի շորերով դուրս եկել` մտածելով, որ մի քանի օրից հետ են վերաառնալու»,-ասաց Արծվիկ Սարգսյանը։
