Էն որ զեկուցվել ա, որ վիճակը լավ ա` դա արդեն հանցագործություն ա. Ո՞վ է հրաման տվել, որ Քարինտակից զորքը դուրս գա. Շուշիի քաղաքապետ. VIDEO

Շուշիի արդեն Նախկին քաղաքապետ Արծվիկ Սարգսյանի կարծիքով՝ Արցախի նախագահ Արայիկ Հարությունյանը հնարավոր է խաբված է եղել։ Նա լրագրողների հետ հանդիպման ժամանակ նկատեց, որ Հարությունյանին զեկուցում էին այն, ինչ հարկ էին համարում, մինչդեռ դա սուտ հույսեր է եղել։

Նա պատմեց, որ նոյեմբերի 5-ին, երբ Արայիկ Հարությունը եկավ Շուշի, Սեյրան Օհանյանը նրան ներկայացրեց, որ վիճակը օրհասական է։ Սակայն դրանից հետո գնդապետերից մեկը նրան զեկուցել է, որ վիճակը հոյակապ է։

«Ես գիտեի, որ Քարինտակում ադրբեջանցիներ են, ճանապարհին ադրբեջանցիներ են, դրա հոյակապը ո՞րն ա»,-ասաց Արծվիկ Սարգսյանն ու պատմեց, որ կային տղաներ, ովքեր հրաժարվում էին գնալ դիրքեր, քանի որ առանց հրամանատարի էին։ Բայց Արայիկ Հարությունյանի հետ հանդիպումից հետո նրանք ոգևորվել ու դիրքեր են բարձրացրացել։

«Էն որ զեկուցվել ա, որ վիճակը լավ ա` դա արդեն հանցագործություն ա: Ես լավ վիճակ չեմ տեսել»,-ասաց Շուշիի քաղաքապետը, ով խոստովանում է` իր տեսածն ու լսածն իրար չեն բռնում։

«Կոնկրետ Քարինտակում մենք զորք ենք ունեցել, չգիտեմ ոնց, նոյեմբերի 3-ին մեր զորքը դուրս է եկել, թշնամու տեխնիկան, տանկերը եկել են, սկսել են խրամատները մեկ-մեկ հաշվել ու խփել դրանց։ Քարինտակցին ոնց կարող էր մենակ այդքանի դեմ պայքարել, այն քարինտակցին, որ մի քանի տարի առաջ 12 ժամ մարտ է մղել թշնամու դեմ, 201 զոհ պատճառել թշնամուն»,-այսօր լրագրողների հետ հանդիպմանն ասում է բանախոսը։

Սարգսյանը պնդում է՝ Շուշիում մեր հրետանին նորմալ չի աշխատել։

«Նոյեմբերի 5-ին մենք գնացել էինք, որ դիրքավորվեինք։ Տեսանք, որ մինամյոտը չկա։ Եթե դա լիներ, կարող էր աշխատել դեպի Իսայի աղբյուր տանող հատվածում ու Քարին Տակի վրա ու ջախջախել դրանց։ Բայց չկար, չգիտեմ, ոնց էին մտածել։ Մինչև հիմա պատասխան չկա, թե ով է հրաման տվել, որ Քարինտակից զորքը դուրս գա, և ինչո՞ւ են հրաման տվել, որ դուրս գա։ Եթե այսքանը մտածում են, իհարկե, կազմակերպված է եղել։ Հակառակ դեպքում պետք է պաշտպանությունն ուժեղացնեին, դիրքերն ավելի ամրացնեին, որպեսզի Զառուսլու գյուղով ադրբեջանցիները չբարձրանային»,-նշում է նա։