«Բռավո». Քոչարյանի արձագանքը իշխանության տեսակետին, թե Սյունիքում տալիս են այն տարածքները, որոնք ադրբեջանցիներից ազատագրել է Քոչարյանը. VIDEO
Հետո էլ ասեն՝ դժգույն, դժբախտ Սյունիքն ում էր պետք։ Այս մասին լրատվամիջոցներին տված իր հարցազրույցում ասել է ՀՀ երկրորդ նախագահ Ռոբերտ Քոչարյանը։
Նա նկատեց, որ երբ նպատակները, քայլերը անկանխատեսելի են, եւ չես կարողանում քո ազգային շահերի տեսանկյունից այդ տրամաբանական շղթան կառուցել, ամեն ինչ հնարավոր է։
«Բայց նաեւ չեմ ուզում այդ կոնսպիրոլոգիայի դաշտ մտնել, երբ կասկածամտությունը մարդու գլխի մեջ է մտնում, սկսում է որդի պես անընդհատ քայքայել։ Իսկ եթե ազգի գիտակցության մեջ է դա սկսում մտնել, ուղղակի ազգն է քայքայելու։ Եվ տպավորություն է, որ սա մեր հայ ժողովրդին քայքայելու եւս մեկ գործիք է։ Չբացատրել, տրամաբանական շղթա փնտրողներին այնպիսի վիճակի մեջ դնել, որ մարդիկ տարակուսում են՝ այս ինչ է կատարվում, ինչի համար է այս քայլն արվում կամ այն քայլն արվում, եւ կասկածամտության այդ որդը մտցնում են մարդկանց ուղեղի մեջ։ Դա նույնիսկ ավելի վտանգավոր բան է, քան պատերազմում ինչ-որ բան թաքցնելը։ Երկարատեւ առումով, սա ազգը քայքայելու գործոն է դառնում»,-ասել է ՀՀ երկրորդ նախագահը:
Հարցին, թե Սյունիքից հանձնվել են միայն այն հատվածերը, որոնք գրավել էին Քոչարյանը եւ մինչեւ 2018-ը հերոս համարվողներն էին գրավել Ադրբեջանից, բայց Սյունիքից ոչ մի միլիմետր չի հանձնվել, երկրորդ նախագահն ասել է․
«Բռավո, եթե այդ մարդիկ կարողանում են արտահայտվել նման կերպ, հետո հանգիստ փողոց դուրս գալ, աշխատանքի գնալ, շփվել հարեւանների հետ, հարցազրույցներ տալ, ուրեմն մենք՝ որպես ազգ, գոյատեւելու, ուժեղանալու ներքին ռեսուրս չունենք։ Կարող են լինել մարդիկ, որ այդպիսի մտքեր են արտահայտում, բայց նրանք այս երկրում պետք է լուսանցքում հայտնվեն։ Մարդիկ ուղղակիպետք է մերժեն նման կարգի մտածելակերպն ընդհանրապես։ Մենք շագրենի կաշվի պես ուղղակի փոքրանալու ենք»։
