Արարատ Միրզոյանի ծեծի դրվագով կալանավորված անձ է ազատ արձակվել. Ալեքսանդր Կոչուբաև

Պարզվում է` Նիկոլ Փաշինյանի աշխատասենյակի բռնակn ավելի բարձր արժեք է, քան` Արարատ Միրզոյանի կյանքը և առողջությունը։ Այս մասին ֆեյսբուքյան իր էջում գրել է փաստաբան Ալեքսանդր Կոչուբաևը։

«Այսօր տեղեկացանք, որ Արարատ Միրզոյանի ծեծի դրվագով կալանավորված անձ է ազատ արձակվել, մինչ այդ կալանքից ազատվել էր ժամացույցի գողության դրվագով անցնող անձը։ Չխորանալով նշված գործերի մանրամասնությունների մեջ, ինչպես նաև հարգելով այդ անձանց ազատության իրավունքը, պետք է խոսեմ մի շատ կարևոր խնդրի մասին։

Հարաբերակցության մեջ դիտելով նշված դրվագները և նույն օրը տեղի ունեցած մյուս իրադարձություններով հարուցված քրեական գործն ակնհայտ է դառնում, որ գործ ունենք կանխակալ վերաբերմունքի հետ։

Համեմատության են դրվում մարդու կյանք առողջություն, անձնական ունեցվածք մի կողմից և վարչապետի աշխատասենյակի բռնակը մյուս կողմից։ Զավեշտն այն է, որ բռնակի դրվագը ավելի վտանգավոր է, այնքան վտանգավոր, որ կարելի է հաղթահարել անձի ազատության կանխավարկածը։ Եվ չասեք, թե ապացույցների համակցության մեջ է խնդիրը, որովհետև մյուս դրվագներով ապացույցներ չկան, կա միայն վարույթն իրականացնող մարմնի զառանցանք։

Սա ևս մեկ փաստ է, որ իշխանական շրջանակները իրենց դավաճանությունը կանխել փորձող անձանց դեռևս երկար են պլանավորել պահել անազատության մեջ, սակայն շտապում եմ հիասթափեցնել` չի ստացվելու, թույլ չենք տալու, որ ստացվի»,-գրել է փաստաբանը։