ԵՏՄ-ն թռչնարտադրողների հույսերը չի արդարացրել

«Հայաստանը ձվի ապահովության առումով ինքնաբավ է, ներկրելու անհրաժեշտություն այս տարի չկա, Ամանորին ևս թռչնարտադրողները կապահովեն շուկան»,- Newspres.am-ի հետ զրույցում ասաց Թռչնարտադրողների միության նախագահ Սերգեյ Ստեփանյանը, հավելելով, որ ներկայումս օրական արտադրվում է 860 000 հատ ձու, իսկ ողջ դեկտեմբերի համար մեկ անձին հասնելու է լրացուցիչ 15 հատիկ ձու:

Նա մանրամասնեց, որ 2015թ-ի նոյեմբերին միջին կարգի ձվի թողարկման գինը սովորաբար կազմել է 49/50 դրամ, իսկ նախորդ տարի նույն ժամանակահատվածում կազմում էր 60 դրամ:

Ըստ նրա` նախորդ տարվա ձվի նման բարձր գինը պայմանավորված էր նրանով, որ ժամանակին թռչնարտադրողները չէին կարողացել թռչնագլխաքանակ ձեռք բերել, քանի որ բանկերը վարկ չէին տալիս, իսկ այս տարի բանկերի հետ կարողացել են սահուն աշխատել, ձեռք են բերել ածան հավերի գլխաքանակ Ռուսաստանից և Իրանից, կարողացել են ապահովել ձվի շուկան:

Ինչ վերաբերում է արտահանմանը, ապա Ս. Ստեփանյանը նշեց, որ 2009 թ-ի  կատարվել է վերջին արտահանումը Վրաստան, ավելի հեռու չեն էլ կարող արտահանել, ելնելով ձվի ֆիզիոլոգիական հատկություններից, սակայն այժմ թռչնարտադրողները այդ մասին չեն մտածում:

Նշենք, որ ձվի հանրապետական միջին գինը 2015թ. նոյեմբերին 2014թ. նոյեմբերի համեմատ նվազել է 19.1%-ով,իսկ 2015թ. հոկտեմբերի համեմատ գրանցվել է 2.8 % գնաճ: Մայրաքաղաքում ձվի գինն աճել է 2.6%-ով: Այս մասին տեղեկացնում են Ազգային վիճակագրական ծառայությունից:

Ինչ վերաբերում է թռչնամսին, ապա Ստեփանյանը նշեց, որ այս տարի երեք նոր արտադրություն է սկսել գործել, հույս են ունեցել նաև արտահանել, հատկապես ԵՏՄ շրջանակներում, սակայն թռչնարտադրողների հույսերը չեն արդարացել:

«Ռուսաստանում մեր թռչնամսի կարիքը չունեն, մերը գնային առումով մրցունակ չէ: Հայաստանում կերը մեկ կգ-ն 300 դրամ է, իսկ ՌԴ-ում 200 դրամ, այնպես որ ՀՀ-ում հավի մսի ինքնարժեքը բարձր է և արտահանելուց չենք կարող էժան վաճառել»,- ասաց նա:

Ինչ վերաբերում է թռչնամսի ներկրումներին, ապա նշեց, որ տարեկան 30 հազար տոննա ներկրվում է, իսկ մոտ 8 հազար տոննա կազմում է տեղական արտադրանքը. ներկրվող թռչնամիսը նաև տեղականի հետ համեմատած էժան է, թեև տեղականը որակական հատկանիշներով բարձր է, սակայն գնային առումով նախընտրում են ներկրվածը:

Տեղական արտադրողները կարողանում են ապահովել հանրապետության թռչնամսի պահանջարկի 30 տոկոսը: