Կոտայքցիները գնդապետ Արարատ Մանուչարյանից չեն կարողանում «պոկել» պատերազմին իրենց մասնակցությունը հավաստող փաստաթղթերը

ՀՀ կառավարությունը նախորդ տարվա դեկտեմբերի 10-ի նիստում որոշում կայացրեց, ըստ որի՝ պետությունը 100 տոկոս փոխհատուցում պետք է տրամադրեր 2020 թ.-ի սեպտեմբերի 27-ից Ադրբեջանի կողմից Արցախի դեմ սանձազերծված պատերազմի մասնակից ուսանողներին և մարտական գործողությունների մասնակիցների ուսանող զավակներին, կնոջը կամ ամուսնուն:

Համաձայն հաստատված որոշման` ամբողջությամբ պետք է փոխհատուցվեր 2020 թ.-ի առաջին կիսամյակի ուսման վարձավճարը: Ուսման վարձի փոխհատուցման նախագիծը ներկայացնելիս Վահրամ Դումանյանը նշել էր, որ որոշման շահառու կարող են հանդիսանալ առկա և հեռակա ուսուցմամբ վճարովի համակարգում միջին մասնագիտական ուսումնական հաստատությունների, բուհերի բակալավրիատի, մագիստրատուրայի, ասպիրանտուրայի և կլինիկական օրդինատուրայի սովորողները: Այն ուսանողները, որոնք արդեն վճարել էին ուսման վարձը, ապա համապատասխան չափով վճարած գումարը պետք է փոխանցվեր հաջորդ կիսամյակ, իսկ ավարտական կուրսի ուսանողների վճարած գումարը պետք է վերադարձվեր:

Որոշման շահառու էին հանդիսանալու այն սովորողները, որոնք 2020 թվականի սեպտեմբերի 27-ից Ադրբեջանի Հանրապետության կողմից Արցախի Հանրապետության դեմ սանձազերծված պատերազմի ընթացքում մասնակցել էին մարտական գործողություններին, ում օրինական ներկայացուցիչը (ծնող, որդեգրող կամ խնամակալ) 2020 թվականի սեպտեմբերի 27-ից Ադրբեջանի Հանրապետության կողմից Արցախի Հանրապետության դեմ սանձազերծված պատերազմի ընթացքում մասնակցել էին մարտական գործողություններին, ում ամուսինը 2020 թվականի սեպտեմբերի 27-ից Ադրբեջանի Հանրապետության կողմից Արցախի Հանրապետության դեմ սանձազերծված պատերազմի ընթացքում մասնակցել էր մարտական գործողություններին:

Մարտական գործողություններին մասնակցությունը հավաստվում էր Պաշտպանության նախարարության զորակոչային և զորահավաքային համալրման ծառայության կամ քաղաքացու զինվորական հաշվառման վայրի տարածքային ստորաբաժանման (զինվորական կոմիսարիատ) կողմից տրամադրված տեղեկանքի միջոցով կամ զինվորական հաշվառման գրքույկում համապատասխան նշմամբ, իսկ այլ զորքերի կազմում՝ համապատասխան լիազոր պետական մարմնի կողմից տրամադրված տեղեկանքի միջոցով՝ դիմում ներկայացնելուց հետո երեքշաբաթյա ժամկետում:

2020-2021 ուսումնական տարվա 1-ին կիսամյակի ուսման վարձի 100% փոխհատուցում ստանալու համար շահառուները կարող էին դիմել ուսումնական հաստատության ղեկավարությանը: Միջոցառումից օգտվելու համար անհրաժեշտ էր բուհին ներկայացնել հետևյալ փաստաթղթերը. անձը հաստատող փաստաթուղթ, մարտական գործողություններին մասնակցությունը զինված ուժերի կազմում հավաստող փաստաթուղթ:

Եվ այսպես․ թվում է՝ ամեն ինչ պարզ էր, ընթացակարգն էլ՝ մատչելի։ Բայց պարզվում է, որ պատերազմի մասնակիցներն առ այսօր՝ պատերազմից 3 ամիս անց էլ, ամեն քայլափոխի հանդիպում են դժվարությունների։

Մասնավորապես, NEWSPRESS.am-ն ահազանգեր է ստացել պատերազմի մի քանի մասնակցից, ովքեր Զորակոչային և զորահավաքային համալրման ծառայության Կոտայքի մարզի տարածքային ստորաբաժանման բաժանմունքի ղեկավար, գնդապետ Արարատ Մանուչարյանից որևէ կերպ չեն կարողանում ստանալ մարտական գործողություններին մասնակցությունը զինված ուժերի կազմում հավաստող փաստաթուղթը։ Գնդապետ Մանուչարյանն անընդհատ տանում-բերում է զինծառայողներին ու «էսօր-էգուց անում»՝ անհարկի պատճառաբանություններ բերելով։ Արդյունքում զինծառայողների զավակները ստիպված են լինելու իրենք վճարել ուսման վարձերը՝ այն պարագայում, երբ նրանց ծնողները մեկ ամսից ավել փաստացի չեն աշխատել և եկամուտ չեն ունեցել՝ պատերազմի դաշտում լինելու պատճառով։ 

Ստացվում է, որ ինչպես այս կառավարության բազմաթիվ որոշումներ և խոստումներ, այնպես էլ այս մեկը մանր ու միջին չինովնիկների պատճառով, գուցե նաև ավելի «վերևների» թույլտվությամբ մնում են թղթի վրա։ Ասել է թե՝ հերթական անգամ անունը կա, ամանումը չկա։