Առնվազն հոկտեմբերի 19-ից հետո մարդկային ու տարածքային բոլոր կորուստների համար պատասխանատվություն է կրում ԶՈւ ԳՇ պետը․ Արթուր Ղազինյան

ԶՈւ ԳՇ պետն անձամբ է պատասխանատվություն կրում հոկտեմբերի 19-ից հետո բոլոր կարուստների համար։ Այս մասին լրագրողների հետ հանդիպմանն ասաց Հայրենիքի փրկության շարժման մեջ ընդգրկված «Մեկ Հայաստան» կուսակցության նախագահ Արթուր Ղազինյանը։

Նրա դիտարկմամբ, եթե գլխավոր շտաբը գործեր Սահմանդրությամբ իրեն տրված լիազորություններով, ապա մենք հոկտեմբերի առաջին տասն օրվա ընթացքում այլևս չէինք ունենա Նիկոլ Փաշինյան անունով վարչապետ, այլ զինվորական ղեկավար։ Դա իրենց պարտքն էր, իրենք պարտավոր էին դա անել:

Սա հիմք է տալիս Ղազինյանին եզրակացնելու, որ ԶՈւ ԳՇ պետ Օնիկ Գասպարյանն այժմ անձամբ է պատասխանատվություն կրում առնվազն հոկտեմբերի 19-ից հետո բոլոր մարդկային ու տարածքային կորուստների համար։

«Սա անընդհատ պետք է հրապարակային հնչեցվի, քանի որ նրանց վրա էր դրված զինվորների կյանքի, առողջության ապահովումը, իրենք էին պարտավոր ապահովել Հայաստանի տարածքային ամբողջականությունը»,- ասաց Ղազինյանը։

Նրա գնահատմամբ, դավաճանության ևս մեկ ապացույց է այն, որ չնայած հոկտեմբերի 3-ին ԳՇ պետի զգուշացմանը, քաղաքական իշխանությունը որոշել է շարունակել պատերազմը, «մինչև Ադրբեջանի դրոշի օրը այն ծածանվի Շուշիում»։

«Բոլորն են խոսում, որ տեղի է ունեցել դավաճանություն, մի մասն ասում է ուղղակիորեն, ակադեմիկոս, նախկին դատախազ, քննիչ, դոցենտ, դոկտոր իրավաբաններն պնդում են, որ տեղի է ունեցել դավաճանություն, պետք է դավաճանն անհապաղ ձերբակալվի, որպեսզի նոր դավաճանություններ չլինեն, քաղաքական գործիչներն ասում են՝ եղել է դավաճանություն, երկրորդ և երրորդ նախագահներն այդ մասին ասում են անուղղակիորեն, նրանց արտահայտած ցանկացած միտք, պարունակում է հաղորդում հանցագործության մասին։ Նորից եմ կրկնում՝ դատախազությունը դարձել է քաղաքական մարմին»,- ասաց նա։