«Հայկական լեռնաշխարհի և հարակից տարածքների ժողովուրդների քրիստոնեական պատմամշակութային ժառանգությունը» թեմայով վեբ-սիմպոզիում. VIDEO

Ս/թ մարտի 3-ին տեղի ունեցավ «Հայկական լեռնաշխարհի և հարակից տարածքների ժողովուրդների քրիստոնեական պատմամշակութային ժառանգությունը» թեմայով՝  միջազգային վեբ-սիմպոզիում։ Գիտաժողովի կազմակերպիչն էր և նախագահը Եվրոպայի հայկական միությունների ֆորումի (ԵՀՄՖ) նախագահ դոկտոր Աշոտ Գրիգորյանը։

Համանախագահներն էին՝ Էրմիտաժի պետական թանգարանի գլխավոր տնօրեն՝ ակադեմիկոս պրոֆ. դոկտ. Միխայիլ Պիոտրովսկին և Կենտրոնական Եվրոպայի և Սկանդինավիայի Հայրապետական պատվիրակ՝ Գերաշնորհ Տիրան եպիսկոպոս Պետրոսյանը։

Կազմակերպչական աշխատանքներին մեծ մասնակցություն բերեցին նաև Մայր Աթոռ Սուրբ Էջմիածինը, Վիեննայի ակումբ - Քաղաքական և տնտեսական վերլուծությունների և կանխատեսումների համաեվրոպական կենտրոն - Խաղաղության պաշտպանության դաշինքը (PANAP)։

Իր պատվավոր ներկայությամբ հանդես եկավ և գիտաժողովի բացմանն իր պատգամն ու օրհնությունը հղեց ամենքին Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսը։
ԵՀՄՖ նախագահ դոկտոր Աշոտ Գրիգորյանն իր բացման խոսքում կարևորեց գիտաժողովի բացառիկ նշանակությունը, որի նպատակն է լինելու քրիստոնեական մշակույթի ոչնչացմանն ուղղված գործողությունների հեղինակ-պետությունների ղեկավարների հանդեպ միջազգային դատարաններով խիստ պատժիչ միջոցներ սահմանելը։ Գիտաժողովն իր եզրակացության մեջ պետք է ներկայացնի այն ուղիները, որոնք կօգնեն կասեցնելու մշակութային ցեղասպանությունը։

Ողջույնի խոսք հղեցին նաև Պետական Էրմիտաժի գլխավոր տնօրեն պրոֆ․ Միխայիլ Բ. Պիոտրովսկին, Բրիտանական Լորդերի պալատի անդամ և նախկին փոխխոսնակ, սոցիոլոգ և հայտնի իրավապաշտպան Քվինսբերիի բարոնուհի Քոքսը, Քենթերբերիի նախկին արքեպիսկոպոս Պատվավոր լորդ Ջորջ Լեոնարդ Քերին Քլիֆթոնից, Պատվավոր լորդ Մարկիզ Րիդինգը, Նորին Սրբություն Եպիսկոպոս դոկտոր Պատրիկը (Անգլիա), Կենտրոնական Եվրոպայի և Սկանդինավիայի Հայրապետական պատվիրակ Գերաշնորհ Տիրան եպիսկոպոս Պետրոսյանը։